तिहारमा मात्रै १० अर्बको सुनचाँदीको कारोबार

काठमाडौं- तिज र दसैंमा समेत उत्साहजनक व्यापार नभएको सुनचाँदीको कारोबार तिहारमा फस्टाएको छ । तिहारको पाँच दिनको अवधिमात्रै १० अर्ब रुपैयाँको कारोबार भएको छ। 

नेपाल सुनचाँदी महासंघका अनुसार यो कारोबार अपेक्षा गरिएको भन्दा दोब्बरले बढि हो । यसपटक ५ अर्ब रुपैयाँको हाराहारीमा मात्र सुनचाँदीको कारोबार हुने अनुमान गरिए पनि दोब्बर बढी कारोबार भएको महासंघले जनाएको छ । 

तिहारमा भएको सुनचाँदीको कारोबारलाई व्यवसायीहरुले उत्साहजनक भनेका छन् । सुस्ताएको कारोबार फेरि फस्टाएको अनुभूति तिहारको व्यापारले गराएको छ  । महासंघका निवर्तमान अध्यक्ष तेजरत्न शाक्यले भने । 

वर्षभरिमा हुने कारोबारको २० देखि २५ प्रतिशत तिहारमा हुने गरेको छ । यसपटक ३५ प्रतिशतभन्दा बढि कारोबार भएको व्यवसायीको ठहर छ । 

सुनको भाउ अकस्मात आकाशिएपछि यसको कारोबार सुस्ताएको थियो । तिजको मुखसम्म आइपुग्दा सुन प्रतितोला ७३ हजारसम्म पुगेको थियो । तर, यो क्रमश घट्दै तिहारसम्ममा ७० हजारसम्ममा आइपुगेको थियो । अहिले सुनको भाउ तोलाको ७१ हजार रुपैयाँ र चाँदी ८ सय ६० रुपैयाँ छ ।