गुन्डा नाइकेसहित २५ जुवाडे पक्राउ, २ करोड ६७ लाख बरामद

काठमाडौं- प्रहरीले काठमाडौँ महानगरपालिका वडा नं ३ पीपलमार्गबाट दुई करोड ६७ लाख नगदसहित २५ जना जुवाडेलाई पक्राउ गरेको छ । 

 विक्रम गौतमको घरमा जुवा खेलिरहेको अवस्थामा महानगरीय प्रहरीवृत्त महाराजगञ्जको टोलीले शनिबार राति छापा मारि ठूलो रकमसहित उनीहरुलाई पक्राउ गरेको हो । 

वृत्तका प्रमुख प्रहरी नायब उपरीक्षक उमेश लम्सालले ठूलो मात्रामा हारजीत हुने गरी जुवा खेलिरहेको अवस्थामा कौडासहित उनीहरुलाई पक्राउ गरिएको जानकारी दिए । 

राससका अनुसार पक्राउ पर्नेमा बलराम सापकोटा, सोभित सिलवाल, प्रदीप बोगटी, रामकृष्ण केसी, इन्दु श्रेष्ठ, रञ्जन राजबंशी, सीताराम खड्का, रोशन तामाङ, राम तामाङ, कृष्ण भण्डारी, सुमन गुरुङ छन् । 

यसैगरी सुमन अग्रवाल, सोदेल कार्की, पवन अग्रवाल, पवित्रकुमार कार्की, बलराम सापकोटा, मुक्ति लामा, भक्त तामाङ, शम्भु बुढाथोकी, प्रेम थापामगर, अशोक श्रेष्ठ, हलामप्रसाद पराजुली, बुद्ध लामा, थम्कु शेर्पा र नवाङ लामा रहेका छन् ।

बले भनेर चिनिने बलराम सापकोटा गुन्डा नाइके भएको प्रहरीले जनाएको छ । उनी प्रहरीको निगरानीमा थिए । पक्राउ परेका सबैलाई कानूनअनुसार कारवाही गरिने महानगरीय प्रहरी परिसर काठमाडौंका एसएसपी उत्तमराज सुवेदीले बताए ।