साफ यू-१५ : नेपालले भुटानको सामना गर्दै

काठमाडौं- भुटानमा जारी तेस्रो संस्करणको यू-१५ महिला साफ च्याम्पियनसिप अन्तर्गत नेपालले आफ्नो लिगको अन्तिम खेल आज (आईतबार) भुटानसँग खेल्दै छ। खेल भुटानको चाङ्लिमिथाङ रंगशालामा नेपाली समय अनुसार साँझ पौने ६ बजे सुरु हुनेछ।

प्रतियोगितामा दुई खेल खेलीसकेको नेपाल जित विहिन छ। पहिलो खेलमा भारतसँग ४-१ गोलले पराजित भएको नेपाल दोस्रो खेलमा बंगलादेशलाई २-१ ले पराजित भएको थियो। 

सुरुवाती दुई खेल गुमाएसँग नेपाल प्रतियोगिताबाट बाहिरिसकेको छ। यता आयोजक भुटान पनि प्रतियोगिताबाट बाहिरिसकेको छ। त्यसैले यो खेल दुबै टोलीका लागि प्रतिष्ठाको लडाई मात्र हुने छ। नेपाल लिग चरणको अन्तिम खेलमा घरेलु टोलीलाई पराजित गर्दै प्रतियोगितामा सुखद अन्त्य गर्न चाहन्छ। 

नेपाल र भुटान प्रतियोगिताबाट बाहिरिएसँगै भारत र बंगलादेशले प्रतियोगिताको उपाधिका लागि प्रतिस्पर्धा गर्ने तय भैसकेको छ। फाइनलमा भिड्नु पूर्व भारत र बंगलादेशले लिग अन्तर्गत आफ्नो अन्तिम खेलमा एक पटक पहिले नै भिड्ने भएका छन्। यी दुई टोलीबीचको खेल पनि आजै हुनेछ। 

उपाधि जित्ने लक्ष्य सहित भुटान गएको नेपाली टोली तीनवटै स‌ंस्करणमा लिग चरणाबाटै बाहिरिएको छ।  प्रतियोगिताको पहिलो संस्करणको उपाधि बंगलादेश र दोस्रो संस्करणको उपाधि भारतले जितेको थियो।