दसैं नमनाउने सहर खोकना (तस्बिरहरु)

ललितपुर- जावलाखेलबाट करिब ७ किलोमिटर दक्षिणतर्फ भैंसेपाटी हुँदै खोकना पुगिन्छ । 

देशैभर दसैंको चहलपहल भइरहँदा यो पुरानो नेवार वस्तीमा भने दसैं लागेको छैन । अधिकांश परिवार हिन्दू भए पनि यहाँ घटस्थपनामा जमरा राखिंदैन, दसैंको टीका पनि हुँदैन । 

यो वस्तीले दसैं मनाउन छाडेको करिब २०० वर्ष भइसकेको स्थानीय वासिन्दा बताउँछन् । बरु दसैंका बेला खोकनमा सिद्धिकाली जात्रा हुन्छ । जसलाई स्थानीय लवजमा सिकाली जात्रा पनि भनिन्छ। अहिले खोकनामा सिकाली जात्राकै धुमधाम छ ।

घटस्थापनादेखि सप्तमीसम्म एक हप्ता लामो सिकाली जात्रामा रुद्रायणी देवीका साथै विभिन्न देवी देवताहरूको पूजा गरिन्छ । 

जात्राका बेला आफन्तहरु भेला भई भोज गर्ने चलन छ । जात्राको व्यस्तता ले गर्दा दशैं मनाउन बिर्सेको, नभ्याएको बताउँछन् यहाँका बुढापाका ।