संस्थानले तोक्यो खसी र च्याङग्राको मूल्य

काठमाडौं - नेपाल खाद्य संस्थानले खसी र च्याङग्राको मूल्य तोकेको छ। सोमबार बसेको संस्थानको बैठकले खसी र च्याङग्राको मूल्य तोकेको हो। संस्थानले जिउँदो खसीको मूल्य किलोको ५५० र च्याङग्रा किलोको ७३० तोकेको छ।
 
निजी व्यवसायीले जिउँदो खसी ६२० र च्याङग्रा ७६० मा बिक्री गर्दै आएका छन्। संस्थानले निजी व्यवसायीको मूल्यभन्दा खसीमा रु ७० र च्याङग्रामा रु ३० कम गरेर बिक्री मूल्य तोकेको हो।
 
यो मूल्यमा सरकारले १० रुपैयाँ अनुदान दिएका कारण थप सहुलियत भएको हो। संस्थानले दशैंमा बिक्रीका लागि तीन हजार खसी र च्याङग्रा ल्याएको जनाएको छ। मूल्य निर्धारण भएसँगै संस्थानले आजदेखि नै खसी र च्याङग्रा बिक्री वितरण सुरु गरिसकेको छ।
 
बजारमा दशैंको लागि ल्याइएका खसी र च्याङग्राको बजार मूल्य अस्वाभाविक रुपमा बढाउने गरेका कारण मूल्यमा हस्तक्षेप गर्नका लागि पनि संस्थानले खसी र च्याङग्रा ल्याएर बिक्री गर्ने गरेको हो। संस्थानले खसी र च्याङग्रा बिक्री गरेकै कारण निजी व्यवसायीले अस्वभाविक मूल्य निर्धारण गर्न पाउँदैनन्।
  
संस्थानले बिक्री गर्ने खसी र च्याङग्रामा सर्वसाधरणको विश्वास रहीआएको छ। संस्थानले आफूले बिक्री गर्ने गरेको खसी र च्याङग्राको निरोगितासमेत परिक्षण गर्ने गरेको छ।

संस्थानका अनुसार सोमबारसम्म ३७० खसीबोका र ५५० च्याङग्रा काठमाडौं आइसकेका छन्। बाँकी एकदुई दिनमा नै काठमाडौं आइपुग्ने संस्थानले जनाएको छ। खसीबोका १६ गतेसम्म काठमाडौं भित्रने खाद्य संस्थानका सूचना अधिकृत शर्मिला न्यौपानेले जानकारी दिइन्।