प्रदेश २ मा सञ्चार क्षेत्रलाई व्यवस्थित र समृद्ध बनाउछौं : सञ्चार मन्त्री साह

पर्सा- प्रदेश नम्बर २ का आन्तरिक मामिला तथा सञ्चार मन्त्री भरत प्रसाद साहले प्रदेश २ मा सञ्चार क्षेत्रलाई व्यवस्थित र समृद्ध बनाउन कार्ययोजना बनाउने काम भइरहेको बताएका छन्। 

आर्थिक भारबाट बन्द हुने स्थानीय पत्रिकालाई प्रथमिकता दिएर कार्ययोजना तयार भइरहेको उनले बताए। उनले पहुँचको आधारमा विज्ञापन दिने कामलाई समेत निरुत्साहित गरिने बताए।

मध्य नेपाल मिडिया प्रालिद्धारा सञ्चालित पत्रिकाको पाँचौ वार्षिकोत्सव समारोहमा बोल्दै मन्त्री साहले सञ्चार क्षेत्रलाई व्यवस्थित र समृद्ध बनाउन मन्त्रालय गम्भीर रहेको बताए। उनले सञ्चार संस्थालाई बर्गाीकरण गरेर त्यसकै आधारमा लोककल्याणकारी विज्ञापन उपलब्ध गराइने बताए।

प्रदेश २ मा घुम्टो प्रथा, बोक्सी प्रथा जस्ता विकृति महिलालाई मूलधारमा ल्याउनबाट वञ्चित गराएको हुँदा सञ्चारमाध्यममार्फत समाजमा विद्यमान विकृतिबारे नागरिकलाई जागरुक बनाउनुपर्नेमा उनले जोड दिए। राज्यको चौथो अंग पत्रकारिताबाट समाजको रुपान्तरण गर्ने चेष्टाका साथै उत्पिडीत जनताका आवाजलाई राज्यको निकायमा पुर्‍याउने पत्रकारहरूको पहिलो कर्तव्य भएको उनले बताए।