विषादी परीक्षण नगर्ने निर्णय : आपूर्तिमन्त्रीले माफी मागे

काठमाडौं- उद्योग, वाणिज्य तथा आपूर्तिमन्त्री मात्रिका यादवले पूर्वाधार नै नहेरी भारतबाट आयात हुने सागसब्जी तथा फलफूलमा विषादी परीक्षण गर्ने निर्णय गरेको भन्दै माफी मागेका छन् । 

मन्त्री यादवले पूर्वाधार नभई निर्णय गरेर आफूले गल्ती गरेको भन्दै माफी मागेका हुन् । उनले मन्त्रालयका सचिवहरुका कारण आफूले त्यस्तो निर्णय गरेको बताए ।

मन्त्रालयमा सोमबार पत्रकार सम्मेलन गरी मन्त्री यादवले भने, ‘प्रधानमन्त्री कार्यालय, कृषि र आफ्नै मन्त्रालयका चार सचिवले मलाई डुबाए । यसबारे निर्णय गर्ने बेलामा उनीहरूले मलाई गुमराहमा राखे ।’

मन्त्री यादवले प्रधानमन्त्री वा अरू कसैको दबावमा निर्णय फिर्ता नलिएको दाबी गरे। 

‘सचिवहरुले मलाई जानकारी नै दिएनन् । पूर्वाधार नभइ निर्णय गर्नु मेरो गल्ती थियो । सबै जिम्मा म लिन्छु’ उनले भने, ‘म जनतालाई विषादी खान दिने छैन । अहिलेलाई गल्ती भयो । माफी माग्छु ।’ उनले थप्पड हानेर सन्तोष मिल्छ भने आफूलाई हान्न आग्रह गरे।