प्रस्तावित चार राजदुत संसदीय सुनुवाइमा

काठमाडौं- प्रस्तावित चार राजदूतहरुको सुनुवाइ सोमबार (आज) हुँदै छ । सुनुवाइका लागि संसदीय सुनुवाइ समितिको बैठक बिहान साढे ८ बजे बस्दैछ ।

बैठकमा सरकारले सिफारिस गरेका चार देशका लागि प्रस्तावित राजदूतको सुनुवाई हुने समितिका सभापति लक्ष्मणलाल कर्णले जानकारी दिए।  अष्ट्रेलियाका लागि महेशराज दाहाल, बंगलादेशका लागि डा. वंशीधर मिश्र, कतारका लागि नारदनाथ भारद्वाज र स्पेनका लागि दावाफुटी शेर्पाको नाम सरकारले सिफारिस गरेको छ । 

चार राजदूतको व्यक्तिगत रूपमा कसैमाथि उजुरी नपरेको र दुईवटा सैद्धान्तिक उजुरी परेका समितिका सभापति कर्णले जानकारी दिए । समितिले प्रस्तावित राजदूतहरुविरुद्ध कुनै उजुरी भए उजुरी दिन असार १४ गतेसम्म समयसीमा दिएको थियो ।

व्यक्तिमाथि उजुरी नपरेकाले चारैजना स्वतः राजदूतमा सुनुवाइ समितिबाट अनुमोदित हुनेछन्। समितिले नाम अनुमोदन गरेपछि नियुक्तिको बाटो खुल्ने छ ।