कोपा अमेरीकाको उपाधि ब्राजिललाई 

एजेन्सी- ब्राजिलले घरेलु मैदानमा आयोजना भएको कोपा अमेरिका फुटबलको उपाधि जितेको छ । आईतबार राति भएको फाइनलल खेलमा पेरुलाई ३-१ गोलले पराजित गर्दै ब्राजिलले उपाधि जितेको हो । 

१२ वर्ष पछि फाइनल पुगेको ब्राजिलको नवौं कोपा अमेरिका उपाधि हो । पछिल्लो समय ब्राजिलले सन् २००७ सालमा कोपाको उपाधि जितेको थियो । यता ४४ वर्ष पछि फाइनल पुगेको पेरुले उपाविजेता बनेको छ । 

यसअघि दुई पटक फाइनल पुग्दा दुबै चोटी उपाधि जितेको पेरुले यस पटक भने ब्राजिलसँग हार ब्यहर्नु परेको छ । ब्राजिलको जितका लागि एभर्टन सुआरेज, ग्याब्रियल जिसस र रिचार्लिसनले एक एक गोल गरे । त्यस्तै पेरुका लागि पाओलो गुरेरोले एक गोल फर्काए । 

खेलको १५ औं मिनेटमा सुआरेजले गोल गर्दै घरेलु टोलीलाई अग्रता दिलाएका थिए । उनले जिससको पासलाई गोल गरेका हुन । ४४ औं मिनेटमा पेरुका पाओलोले पेनाल्टीमा गोल गर्दै खेल १-१ को बरारबीमा ल्याए । 

तर, पहिलो हाफको इन्जुरी समयमा जिससले गोल गर्दै ब्राजिललाई २-१ को अग्रता दिलाए । त्यसपछि दोस्रो हाफमा गोल देख्न भने लामै समय कुर्नु पर्यो । खेलको ७० औं मिनेटमा दोहोरो पहेलो कार्ड खादै जिससले मैदान छाडेपछि ब्राजिल १० खेलाडीमा सिमेटियो । तर खेलको अन्तिम मिनेटमा रिचार्लिसनले प्नाल्टीमा गोल गर्दै ब्राजिललाई ३ १ को जित दिलाए ।