नेपालमा चोरी गर्ने पाकिस्तानी जोडी पक्राउ

काठमाडौं - सिरियल चोरीका घटनामा संलग्न पाकिस्तानी एक जोडीलाई प्रहरीले पक्राउ गरेको छ। पक्राउ पर्नेमा ३२ वर्षीय मोहसिन खान र ३१ वर्षीया पुजा मोहसिन खान रहेका छन्। उनीहरुलाई  भक्तपुर दरबार स्क्वायरस्थित स्वीटहोम बाट पक्राउ गरिएको हो।

ललितपुरको झोछेस्थित राजेन्द्र श्रेष्ठले संचालन गरेको डेभिस मेट्रो मनि एक्सचेन्जमा चोरी भएपछि अपराध अनुसन्धान महाशाखाले अनुसन्धान सुरु गरेको थियो। उनीहरुले डेभिस मेट्रो मनि एक्सचेन्जबाट विदेशी मुद्रा सटहीको बहानामा  ९ सय अमेरिकी डलर, साउदी रियाल तीन हजार तथा चिनियाँ युआन एक हजार ४ सय चोरी  गरि फरार भएका थिए।
 
यसैगरि उनीहरुले गत बैशाख २९ गते भक्तपुरको सुर्यविनायकस्थित रामकृष्ण श्रेष्ठले संचालन गरेको आरके ईलेक्ट्रिक एण्ड इलेक्ट्रोनिक्स सेन्टरबाट ३० हजार रुपैयाँ चोरी गरि फरार भएका थिए भने लोकन्थलीस्थित शन्तकृष्ण हेकाको हेका किचनबाट ७० हजार रुपैयाँ तथा बुटवलस्थित शारदा वाग्लेले संचालन गरेको राइजिङ स्पोर्टस् ग्यालेरीबाट एकलाख पचास हजार चोरी गरेको खुलेको छ।
 
पक्राउ परेका दुबैजना गत बैशाख ३१ गते बुटवलमा पक्राउ  परि  जनही ५० हजार धरौटीमा छुटेका थिए। पक्राउ परेका उनीहरुमाथि थप अनुसन्धान भैरहेको प्रहरीले जनाएको छ।