डकैत गर्न गएका डाका स्थानीयको फन्दामा 

जनकपुरधाम- महोत्तरीको बर्दिवासमा डकैत गर्न गएका एकजना डाकालाई स्थानीयले नियन्त्रमा लिएका छन् । 

बर्दिवास नगरपालिका–७ बस्ने रामसुनर महतो र वडा नम्बर  ६ का चन्देश्वर महतोको घरमा लुटपाट गर्न आएका डाकाहरुको समूह मध्ये एकजनालाई स्थानीयले पक्राउ गरेका हुन् ।
 
पक्राउ पर्नेमा सर्लाही चन्द्रपुर नगरपालिका बस्ने ४० वर्षीय देवनारायण कापड रहेको जिल्ला प्रहरी कार्यालय महोत्तरीले जनाएको छ । डाका गरेर भाग्दै गरेको अवस्थामा स्थानीयले कापडलाई बडहडी खोला नजिक पक्राउ गरेका हुन् । 

स्थानीयको कुटपिटबाट कापड गम्भीर घाइते भएको प्रहरीले जनाएको छ । 

यसैगरी डाकाहरुको कुटपिटबाट चन्देश्वरकी श्रीमती जयवती देवी र २७ वर्षीय  छोरा उमेश महतो घाइते भएका छन् । 

घाइते सबैजनाको उपचार बर्दिवासस्थित एक निजी अस्पतालमा भइरहेको जिल्ला प्रहरी कार्यालय महोत्तरीले जनाएको छ ।

बुधबार राती ६–७ जनाको समूहमा आएका डाकाहरूको समूहले लुटपाट गरि रामसुनर र चन्देश्वरको घरगरी दुई लाख नगद, सुनचाँदीका गरगहना, ल्यापटप, मोबाइललगायतका सरसमान लुटपाट गरेको  छ । 

डाका समूह मध्ये एकजना पक्राउ परेपनि अन्य फरार भएका छन्।  लुटपाटमा संलग्न अन्य व्यक्तिहरुको खोजी भइरहेको प्रहरीले जनाएको छ ।