योग दिवस मनाउन मन्त्री र राजदुत एउटै र्‍यालीमा

काठमाडौं- आज पाँचौं अन्तर्राष्ट्रिय योग दिवस, विभिन्न कार्यक्रम गरि विश्वभरि मनाइदै छ । नेपालमा पनि विभिन्न कार्यक्रमको आयोजना गरिएको छ ।

काठमाडौंको रत्नपार्कबाट राष्ट्रिय सभा गृहसम्म र्‍यालीको आयोजना गरिएको छ । उक्त  र्‍यालीमा शिक्षा विज्ञान तथा प्रविधि मन्त्री गिरिराजमणि पोखरेल, नेपालका लागि भारतीय राजदूत मञ्जिबसिंह पुरीलगायत सर्वसाधारणको उल्लेख्य उपस्थिती रहेको थियो। 

मन्त्री र राजदुत एउटै  र्‍यालीमा सहभागी भएर योग दिवसको प्रचारसमेत गरेका छन् । योगलाई  शारीरिक रुपमा स्वस्थ, मानसिक रुपमा शान्त र आधात्मिक चेतका साथ जिउन सिकाउने कलाको रुपमा चिनिन्छ । 

जुन महिनाको २१ तारिखलाई अन्तर्राष्ट्रिय योग दिवस मनाउने गरिन्छ । भारतका प्रधानमन्त्री नरेन्द्र मोदीको पहलमा संयुक्त राष्ट्रसंघले सन् २०१५ देखि जुन २१ लाई अन्तराष्ट्रिय योग दिवसका रुपमा मनाउन शुरु गरेको हो । 

अन्तराष्ट्रिय योग दिवस मनाउने व्यवस्थाका लागि सन् २०१४ मा संयुक्त राष्ट्रसंघको महासभामा भारतीय प्रधानमन्त्री नरेन्द्र मोदीले प्रस्ताव गरेका थिए । त्यो प्रस्तावलाई नेपालका तत्कालीन प्रधानमन्त्री सुशील कोइरालाले समर्थन गरेका थिए । 

अहिले जुन २१ लाई अन्तर्राष्ट्रिय योग दिवशको रुपमा मनाउने प्रस्तावलाई विश्वका धेरै देशहरुले पनि समर्थन गरिसकेका छन् । संयुक्त राष्ट्रसंघले योगलाई शताब्दी विकासको सुचकाङ्कका रुपमा समेत राखेको छ । 

बदलिँदो जीवनशैली, गलत खानपानका साथमा शरीरमा आवश्यक पोषण व्यायामको कमीले विभिन्न रोगको सिकार पनि भैरहेका छन् । योगले मानिसको  जीवन शैली अनुशासित बनाउन साथै शारीरिक र मानसिक रुपमा चुस्त राख्न मद्दत गर्ने विश्वास गरिन्छ ।