रसुवागढी सुरुङमा थुनिएका १७ मजदुरकै सकुशल उद्धार

रसुवा- निर्माणाधीन रसुवागढी जलविद्युत् आयोजनाको सुरुङमा थुनिएका १७ मजदुरहरुको सकुशल उद्धार गरिएको छ ।

बिहीबार साँझ साढे ८ बजे पहाडबाट सुक्खा पहिरो झरेर सुरुङको प्रवेश मार्ग पहिरोले पुरिँदा १७ मजदुर थुनिएका थिए । 

ठाउँ ठाउँमा खसेको पहिरोका कारण बिहीबार नै उद्धार गर्न नसकेपछि उद्धार टोली रित्तै फर्किएको थियो । शुक्रबार बिहान ६ बजेबाट पुन थालिएको उद्धारको प्रयास करिब ढेड घण्टापछि सफल भएको हो ।
 
उद्धार टोलीले १७ जनाको नै सकुशल उद्धार गरेको प्रमुख जिल्ला अधिकारी अर्जुन भण्डारीले जानकारी दिए । सुरुङभित्र ११ नेपाली र ६ चिनियाँ मजदुर फसेका थिए । उद्धार गरिएकामध्ये सबैको अवस्था सामान्य रहेको र एक जना नेपाली कामदारलाई सामान्य चोट लागेको उनले जानकारी दिए ।
 
पहिरो गएलगत्तै उद्धारका लागि नेपाल प्रहरीको सात, सेनाका १२ र सशस्त्र प्रहरीका २० गरी ३९ जनाको टिम खटिएको थियाे ।

माटो र ढुंगा झरेकाले बाटो अवरुद्ध भएको तथा विद्युत् आपूर्ति पनि बन्द भएकाले बिहीबार राति मजदुरहरूलाई बाहिर निकाल्न कठिन भएको प्रहरीले जनाएको थियो । सोहि टोलीले शुक्रबार बिहान उनीहरुलाई सकुशल बाहिर निकालेको हो ।
 
नेपाल–चीन सीमा क्षेत्रमा रसुवागढी नाकानजिकै रहेको यो जलविद्युत् आयोजना १ सय ११ मेगावाटको रहेको छ  । यो क्षेत्र गोसाइँकुण्ड गाउँपालिका–२, तातोपानी क्षेत्रबाट करिब सय मिटरमाथि पर्छ । यो आयोजनाको सुरुङ निर्माण भइरहेको छ । 

चिलिमे जलविद्युत् आयोजनाको सहायक कम्पनीका रूपमा रसुवागढी जलविद्युत् आयोजना स्थापना भएको हो । चिलिमेले यबिाहेक साञ्जेन र मध्यभोटेकोसीको आयोजना पनि बनाउँदैछ । 

रसुवागढी जलविद्युत् आयोजनाको सुरुवातमै ०७२ वैशाखमा भूकम्प जाँदा पहिरोले एकजनाको ज्यान गएको थियो । भूकम्पले आत्तिएर चीन गएका ठेकेदारलाई फर्काउन लामो समय लागेको थियो । चीनको सिडब्लुई कम्पनीले यो आयोजनाको निर्माण गरिरहेको छ ।