हिन्दूराष्ट्रका लागि सशक्त संघर्षमा उत्रने राणाको चेतावनी

काठमाडौं - राष्ट्रिय प्रजातन्त्र पार्टी (संयुक्त) का अध्यक्ष पशुपति शमशेर जबराले हिन्दूराष्ट्र पूनर्स्थापनाका लागि छिट्टै सशक्त सडक संघर्षमा उत्रिने घोषणा गरेका छन्। हिन्दूराष्ट्र स्थापनाका लागि उनले विदेशी सहयोगसमेत आफूहरुलाई आवश्यक नभएको बताए।

बुधबार काठमाडौंमा आयोजित साक्षात्कार कार्यक्रममा बोल्दै राणाले आफूहरुले हिन्दूराष्ट्र बनाउने वादा गरिसकेकोले यसको लागि सम्पूर्ण शक्तिहरु सशक्त सडक संघर्षमा उत्रिने बताए। उनले विदेशीको ईशारामा दुई/चार नेताले नेपाललाई धर्मनिरपेक्ष बनाएको आरोप लगाए।

नेपालमा ८१ प्रतिशत हिन्दू र ९४ प्रतिशत ॐकार परिवार रहेकोले अब सबै एकीकृत भई हिन्दूराष्ट्र बनाउन लाग्नुपर्नेमा उनले जोड दिए। राणाले भने, ‘नेपाललाई हिन्दूराष्ट्र बनाउनको लागि हामीलाई अन्तको सहयोग चाहिँदैन्। हामीसँग भएको संख्या नै काफी छ।’

अध्यक्ष राणाले प्रमुख प्रतिपक्षी दल नेपाली कांग्रेस यतिबेला ढुलमुल भएर बसिरहेको आरोप लगाए। उनले भने,‘कांग्रेसले प्रमुख विपक्षीको भूमिका खेल्नै सकेको छैन्। अब कांग्रेसले प्रष्ट रुपमा विरोधी शक्तिको नेतृत्व लिनुपर्छ।’ राणाले वर्तमान ओली सरकार यही रुपमा अघि बढे उपयुक्त छैन भन्ने कुरामा कांग्रेस प्रष्ट हुनुपर्नेमा जोड दिए ।

आफ्नो पार्टी र कमल थापाले नेतृत्व गरेको राप्रपाबीच एकताको सम्भावना रहेको उनले बताए। 

शक्तिशाली सरकार गठन भएको एक वर्षभन्दा बढि समय भइसक्दापनि अहिलेसम्म जनताले ठोस उपलब्धि प्राप्त गर्न नसकेको राणाले आरोप लगाए। उनले भने,‘आखिरीमा यो सरकारको काम हेर्दा हात्ति आयो हात्ति फुस्साजस्तै छ।’

मुलुकमा व्यापक भ्रष्टाचार रहेको सुनाउँदै सरकारले यसप्रति पनि चासो नदेखाएको उनको आरोप छ। राणाले राष्ट्रप्रमुखको भूमिका प्रजातन्त्र र गणतन्त्र अनुकुल चल्न नसकेकोमा आपत्ती जनाए। उनले भने,‘अरवौंको खर्च गरेर राष्ट्रपतिको लागि हेलिकप्टरको सवारी तय गरिँदैछ। मेरो काका, जिजुकाकाले दिएको जग्गाले नपुगेर थप जमिन जोड्न कुरा भैरहेको छ। राष्ट्रपतिको यो किसिमको सोख प्रिजेन्ट गर्न सकिँदैन्।’