अखबार : तीन महिना बन्धन बनाएर सामुहिक बलात्कार

काठमाडाैं- राजधानीबाट प्रकाशित बुधबारका राष्ट्रिय दैनिक अखबारहरुले विविध विषयका खबरलाई प्रथमिकतामा पारेका छन् ।
 
केहिले जिम्मेवारी बाँडफाँडमा नेकपामा देखिएको विवादलाई मुख्य समाचार बनाएका छन् भने केहिले कानुन नै संसोधन गरेर गुठीको जग्गा हडप्ने खेल भएको विषयलाई प्राथमिकतामा पारेका छन् । तीन महिना बन्धक बनाएर सामुहिक बलात्कार गरेको र पूर्वलडाकुले नारकीय जीवन विताउनु परेको विषयलाई पनि पत्रपत्रिकाले प्राथमिकताका साथ छापेका छन् ।
 
आजको अन्नपूर्ण पोस्ट्ले धनुषाकी एक किशोरीलाई तीन महिनासम्म बन्धक बनाएर सामूहिक बलात्कार गरेको विषयलाई मुख्य समाचार बनाएको छ ।
 
तीन जनाको समुहले उनलाई खेतबाट घर फर्किदै गर्दा अपहण गरेर लगेको थियो । सो समुहले उनलाई रातारात भारतको मझपरपुर र्पुयायो। किशोरीलाई तीन महिनासम्म बन्धक बनाइयो र उनीमाथि सामूहिक बलात्कार भएकोे छ । किशोरीको हातखुट्टामा दाम्लोले बाँधेको डाम छ। शरीरभर पोलेका फोका छन्। कुटपिटको नीलडाम रहेको समाचारमा उल्लेख छ ।
 
‘घरमा बन्धक बनाएर राखे, रड र लठ्ठीले कुटे,’ पीडित किशोरीले भनिन्, ‘हातखुट्टा बाँधेर सुई लगाइदिन्थ्यो अनि बेहोस बनाएर राख्थ्यो।’ राम्रोसँग खाना र सुत्न नपाएकी ती किशोरीले भनिन्, ‘होसमा आउँदा रुन्थें। मुखमा कपडा कोचिदिन्थे। कञ्चटमा पेस्तोल राखेर मारिदिन्छु भन्थे । फेरि सुई लगाएर बेहोस बनाइदिन्थे ।’ 

जेठ ५ गते उनी पापीको चंगुलबाट भागेर जनकपुर आउन सफल भएकी छन्। अहिले उनी जनकपुर अञ्चल अस्पतालमा उपचार गराइरहेकी छन्। उनी राम्ररी बोल्न र हिँड्न सक्दिनन्। खर्च अभावमा पोसिलो आहार खुवाउन नसकिएको पीडितकी आमालाई उदृत गर्दै अन्नपूर्णले लेखेको छ।
 
यस्तै अन्नपूर्णले सत्तारुढ दल नेकपामा जिम्मेवारी बाँडफाँडलाई लिएर अध्यक्ष केपीशर्मा ओली र माधव नेपालबीच विवाद बढेको विषयलाई पनि प्राथमिकताका साथ छापेको छ ।

७७ वटै जिल्लाको इन्चार्ज र सहइन्चार्जको जिम्मेवारी केन्द्रिय सदस्यलाई दिन लागिएको विषमया उनीहरुबीच विवाद भएको हो । नेता नेपाल दाहोरो जिम्मेवारी दिनु हुन्न भन्ने पक्षमा छन् भने ओली दिनु पर्नेमा अडानमा देखिएका छन् ।
 
आजको नागरिक दैनिकले पनि नेकपामा दोहोरा जिम्मेवारी दिने विषयमा नेता नेपालले नमान्ने अडान राखेको विषयलाई प्राथमिकताका साथ छापेको छ । नेता नेपालको यहि अडानका कारण मंगलबारको सचिवालय बैठक निष्कर्षविहिन भएको थियो । 

यस्तै नागरिकले नारकीय जीवन बितउँदै पूर्वलडाकु शीर्षकमा मुख्य समाचार छापेको छ ।

तत्कालीन माओवादी द्वन्द्वमा घरपरिवार त्यागेर पूर्वलडाकु ३२ वर्षीया निर्मला विक ‘साधना’ तीन वर्षदेखि अचेत छिन्। उनी बेलुका अँध्यारो बढ्दै जाँदा बाख्रा र कुखुरासँगै गोठमा सुताइन्छिन् अनि बिहान तिनै घरपालुवा पशुपन्छीसँगै बाहिर सारिन्छिन्। त्रिवेणी ५ जुगार जबरबोटकी निर्मला आठ वर्ष अगाडि रोगले थलिएकी समाचारमा उल्लेख छ । 

आजको कान्तिपुर दैनिकले कानुन नै संसोधन गरेर गुठीको जग्गा हडप्न खोजिएको विषयलाई मुख्य समाचा बनाएको छ ।

मुलुकमा देवीदेवताका नाममा ७ लाख ५६ हजार बिघा जमिन र २ हजार ६ सय गुठी छन् । परापूर्वदेखि चलिआएका ती गुठीका जग्गा हडप्ने र आफ्ना मान्छे भर्ती गर्ने नियतले सरकारले गुठीसम्बन्धी कानुन संशोधन गर्न लागेको भन्दै सरोकारवालाले आपत्ति जनाएका छन् ।

सरकारले संसद्मा दर्ता गराएको गुठीसम्बन्धी कानुन संशोधन गर्न बनेको विधेयक जस्ताको तस्तै पारित भए धर्म, संस्कृति र सम्पदाको अस्तित्व नै मेटिन सक्ने विज्ञहरूको चेतावनी छ। विधेयक संविधानविपरीत भएकाले खारेज गर्न उनीहरूको माग रहेको समाचारमा उल्लेख छ ।