अफगानिस्तानमाथी श्रीलंका विजयी

एजेन्सी- आईसीसी एकदिवसीय विश्वकप क्रिकेट अन्तरगत श्रीलंकाले पहिलो जित निकालेको छ । मंगलबार राती भएको खेलमा अफगानिस्तानलाई डीएल पद्दतिको आधारमा ३४ रनले पराजित गर्दै श्रीलंकाले विश्वकपमा आफ्नो पहिलो जित निकालेको छ । 

बर्षका कारण खेल प्रभावित भएपछि डीएल पद्दतिको आधारमा ४१ ओभरमा १८७ रनको सामान्य लक्ष्य पाएको अफगानिस्तानले ३२.४ ओभरमा मात्र १५२ रन बनाउन सक्यो । अफगानिस्तानका लागि नाजिबउल्लाह जाड्रनले ४३ रन बनाए । उनले ५६ बलमा ६ चौका सहित ४३ रन जोडेका हुन । 

त्यस्तै हजरतउल्लाह जजाईले २५ बलमा ३ चौका र १ छक्का सहित ३० जोडे । कप्तान गुल्बादिन नाइबले २३ र मोहम्मद नाबीले ११ रन जोड्न बाहेक अन्य ब्याट्सम्यानले दोहोरो अंकमा रन बटुल्न सकेनन् । श्रीलंकाका नुवान प्रदीपले ४ विकेट लिए । त्यस्तै लाथिस मालिंगाले ३ तथा थिसरा पेरेरा र इसुरु गदनाले एक एक विकेट लिए ।

यसअघि टस हारेर पहिले ब्याटिङको निम्तो पाएको श्रीलंकाले ३६.५ ओभरमा सबै विकेट गुमाउँदै २ सय १ रन जोडेको थियो ।तर, खेल बर्षले प्रभावित पारेपछि डीएल पद्दतिको आधारमा अफगानिस्तानलाई १८७ रनको लक्ष्य सुम्पेको थियो ।

सानदार सुरुवात गरेको श्रीलंकाका मध्यक्रमका ब्याट्सम्यान नचल्दा सामान्य योगफलमै सिमित हुन पुग्यो । श्रीलंकाका लागि कुसलले ७८ रनको उत्कृष्ट अर्धशतकीय पारी खेले । उनले ८१ ब्लमा ८ चौका प्रहार गर्दै ७८ रन जोडेका हुन् ।

त्यस्तै कप्तान डिमुथ करुनारत्नले ३० रन जोडे । उनले ४५ बलमा ३ चौका प्रहार गर्दै ३० रनको योगदान दिए । लाहिरु थिरिमानेले ३४ बलमा १ चौका प्रहार गर्दै २५ रन जोडे । लक्मलले १५ र इसुरु उदानाले १० रन जोड्न बाहेक अन्य ब्याट्सम्यानले दोहोरो अंकमा रन छुन सकेनन् ।

१३ ओभरमा ९२ रन पुग्दा पहिलो विकेट गुमाएको श्रीलंकाले २२ औं ओभरमा १४४ रनमा दोस्रो विकेटको रुपमा थिरिमानेलाई गुमायो । त्यसपछि एक पछि अर्को गर्दै श्रीलंकाले विकेट गुमाउँदै गरे पछि श्रीलंका संकटमा पर्यो ।

अफगानिस्तानका लागि मोहम्मद नाबीले ४ विकेट लिए । त्यस्तै डवालत जद्रान र राशिद खानले समान दुई दुई विकेट लिदा हामिद हसनले एक विकेट लिए ।