अबको तीन दिन लगातार वर्षा हुने : अझै २ सातापछि मनसुन भित्रिने

काठमाडौं- अबको तीन दिन लगातार वर्षा हुने जल तथा मौसम पूर्वानुमान महाशाखाले जनाएको छ । 

बंगालको खाडीबाट आएको जलवाष्प र नेपालको पूर्व पश्चिम क्षेत्रमा फैलिएको न्यूनचापीय रेखाका कारण आगामी तीन दिनसम्म मौसम केही खराब हुने महाशाखाले जनाएको हो । आगामी तीन दिन मेघ गर्जनसहित वर्षा र हावाहुरीको पनि सम्भावना रहेको मौसमविद्हरुले बताएका छन् ।
 
आज आइतबार देशका अधिकांश ठाउँमा हल्कादेखि भारी वर्षा हुने मौसमविद् समीर श्रेष्ठले जनाकारी दिए । देशैभर आंशिकदेखि सामान्य बदली रहने र केही पहाडी भूभाग तथा पूर्वी तराईमा मेघ गर्जनसहित वर्षा हुने उनले बताए । 

यसैगरी सोमबार (भोलि) पनि मौसम खराबनै हुनेछ भने मंगलबार पनि देशका अधिकांका ठाउँमा हल्कादेखि भीषण वर्षाको सम्भावना रहेको महाशाखाले जारी गरेको सुचनामा उल्लेख छ । 

मनसुन सुरु हुन अझै दुईसाता लाग्ने  

जल तथा मौसम पूर्वानुमान महाशाखाका अनुसार नेपालमा मनसुन सुरु हुन अझै दुई साता लाग्ने भएको छ । भारतको मौसम विज्ञान विभागले शनिबारबाट प्रवेश गर्ने औसत समय भए पनि मनसुन सुरु हुन अझै एक साता लाग्ने बताएपछि नेपालको मनसुन पनि मनसुन भित्रिन ढिला हुने देखिएको हो ।

प्री–मनसुनको अवधिमा चलेको वायु र भारतमा प्रवेश गर्ने मनसुनी वायुपछि मात्रै नेपालमा मनसुनको पूर्वानुमान गर्ने गरिन्छ । भारतमा नै एक सातापछि मनसुनी वायु प्रवेश गर्ने भएकाले नेपालमा पनि मनसुन ढिला सुरु हुने अनुमान गरिएको जल तथा मौसम पूर्वानुमान महाशाखाले जनाएको छ । 

विगतका वर्षमा भारतको केरलामा १ जुनमा मनसुन सुरु हुँदा नेपालमा १० जुनमा मनसुन प्रवेश गथ्र्यो तर यसवर्ष अझै केरलामा मनसुन प्रवेश नगरेकाले नेपालमा पनि औसतभन्दा ढिलो गरी मनसुन सुरु हुने मौसमविद्हरुले जनाएका छन् । 

वर्षको मनसुनमा औसत वर्षा हुने पूर्वानुमान गरिएको छ । पूर्वका केही पहाडी र तराईका जिल्लामा भने औसतभन्दा पनि कम वर्षा हुने मौसमविद्को पूर्वानुमान छ । लामो समयदेखिको खडेरी हट्दै गइरहेको र पूर्व्तिर अझै त्यो हट्न समय लाग्ने भएकाले त्यसको असर पूर्वी क्षेत्रको मनसुनमा देखा पर्ने मौसमविद्ले जानकारी दिएका छन् ।