सरकारी शैली निरंकुशतावादी : देउवा

भैरहवा – नेकपा नेतृत्वको सरकार निरंकुश हुदै गएको भन्दै पूर्वप्रधानमन्त्री एवम् नेपाली कांग्रेसका सभापति शेर बहादुर देउवाले सरकारविरुद्ध आन्दोलन गर्ने बताएका छन्।

नेपाली कांग्रेस जिल्ला समिति रुपन्देहीको मधवलियामा आयोजित सम्मेलनलाई सम्बोधन गर्दै देउवाले मिडीया, न्यायलय, मानबअधिकार आयोग सबैमाथि सरकारले विभिन्न बहानामा अंकुश लगाउन खोजिएको भन्दै सरकारविरुद्ध आक्रोस व्यक्त गरे। उनले भने, ‘जुन देशमा स्वतन्त्र न्यायपालिका, स्वतन्त्र मिडीया हँुदैन त्यहा प्रजातन्त्र रहन सक्दैन। वर्तमान सरकार पञ्चायत भन्दा पनि बढी नियन्त्रणमूखी हुँदै गएको छ। यो गलत हो।’

उनले सरकारले हरेक क्षेत्रमा गर्दै आएको हस्तक्षेपकारी कार्यको भण्डाफोर जरुरी रहेको बताए। उनले कार्यपालिका सधैं अन्याय तर्फ उन्मूख हुन सक्छ भनेर स्वतन्त्र रुपमा स्थापीत न्यायपालिका र मानव अधिकार आयोग स्थापना गरिएको सन्दर्भ उल्लेख गदै ती निकायलाई नियन्त्रण गरियो भने के हुन्छ भन्दै सरकारले ल्याएको बजेट नेकपाको कार्यकर्तालाई पाल्ने ढंगले आएको बताए।

देउवाले ओली सरकारले देशको सम्पतिमाथी लुट मच्चाइरहेकोसमेत आरोप लगाए। उनले त्यसको कांग्रेसले विरोध गर्ने बताए। उनले भने, ‘सरकारले विदेशबाट आएको सहयाता, जनताले तिरेको कर माथी कार्यकर्ता पोस्ने गरी बजेट ल्याएको छ।’ सम्बोधनको अधिकांश समय सरकार विरुद्ध बोलेका उनले ओली सरकार नसच्चिए इतिहास बोकेको कांग्रेस सरकारविरुद्ध आन्दोलन गर्न बाध्य हुने पनि चेतावनि दिए।