मोदी र ओलीबीच भेटवार्ता, उपहार रुद्राक्षको माला

काठमाडौं - प्रधानमन्त्री केपी शर्मा ओली र भारतीय समकक्षी नरेन्द्र मोदीबीच भेटवार्ता भएको छ। मोदीको शपथग्रहण समारोहमा सहभागी हुन बिहीबार दिल्ली पुगेका ओली र मोदीबीच शुक्रबार दिउँसो दिल्लीस्थित हैदरावाद हाउसमा भेटवार्ता भएको हो। 

भेटमा दुई देशबीचको आपसी सम्बन्धका बारेमा छलफल भएको बताइएको छ। यस्तै प्रधानमन्त्री ओलीले मोदीलाई नेपाल भ्रमणको निम्तो दिएका छन् भने दुई प्रधानमन्त्रीले आपसी सम्बन्ध तथा जनताबीचको सम्बन्ध अझ गहिरो बनाउने प्रतिवद्धता व्यक्त गरेको भारतीय विदेश मन्त्रालयका प्रवक्ता रवीश कुमारले ट्वीटरमार्फत जानकारी दिएका छन्। भेटमा भारतीय प्रधानमन्त्री मोदीलाई प्रधानमन्त्री ओलीले रुद्राक्षको माला उपहार दिए। 

भेटमा मोदीले नेपाल र भारतको सम्बन्ध जनस्तरमा राम्रो हुँदै गएकोप्रति खुसी व्यक्त गरे। बिहीबार सपथमा सहभागी भएका प्रधानमन्त्री ओली नेपाल एयरलाइन्सको नियमित उडानबाट दिउँसो पौने ४ बजे स्वदेश फर्कने कार्यक्रम छ।