कर्मचारीको तलव २० देखि २५ प्रतिशतले बढ्दै

काठमाडाैं- कर्मचारीको तलव भत्ता २० देखि २५ प्रतिशतले बढ्ने भएको छ । आज सार्वजनिक हुने बजेटमार्फत अर्थमन्त्री युवराज खतिवडाले कम्तिमा २० प्रतिशत तलव बढाउने संकेत गरेका छन् ।
 
तीन बर्षयता सरकारी कर्मचारीहरुको तलव बढेको छैन । कर्मचारीहरुको तलव बढाएर मनोवल उच्च बनाउन भन्दै टे«ड युनियनहरुले दबाब दिएका थिए । ट्रेड युनियनकै दबाबअनुसार अर्थमन्त्री खतिवडाले कम्तीमा १५ देखि २५ प्रतिशतसम्म तलव वृद्धि गर्ने तयारी गरेका छन् । 

वार्षिक रुपमा भइराखेको मुल्यवृद्धिका कारण अहिले पाउदै आएका सेवा सुविधाले घरखर्च धान्न नै मुस्किल परेको भन्दै सरकारी कर्मचारीहरुले अर्थमन्त्रीसँग गुनासो गर्दै आएका थिए ।  गतवर्ष तलव भत्ता वृद्धि नगरेको भन्दै अर्थमन्त्री .खतिवडाको कर्मचारीले आलोचना गरेका थिए । 

त्यसैगरी आगामी आर्थिक वर्षको बजेटबाट सांसदलाई दिइने निर्वाचन क्षेत्र पूर्वाधार विकास कार्यक्रम, र सामाजिक सुरक्षा भत्ताको रकम पनि वृद्धि हुने भएको छ । सांसदहरुले प्रति निर्वाचन क्षेत्र १० करोडको माग गरेका छन् तर कम्तीमा पनि ७ करोडको व्यवस्थापन गर्ने प्रधानमन्त्री निकट पूर्वमन्त्री महेश बस्नेतले दाबी गर्दै आएका थिए । 

त्यस्तै सरकारले वृद्धभत्ता समेत बढाउने तयारी गरेको छ । पाँचसयदेखि एक हजार रुपैयाँसम्म भत्ता बढाउने तयारी गरिएको अर्थमन्त्रालय स्रोतले जनाएको छ । चुनावी घोषणा पत्रमा वाम गठबन्धले वृद्धभत्ता ५ हजार पुर्याउने बाचा गरेको थियो ।