उपेन्द्र र बाबुरामबीच एकता : चुनाव चिह्न टुङ्गिएन

काठमाडौं- उपेन्द्र यादवले नेतृत्व गरेको संघीय समाजबादी फोरम र बाबुराम भट्टराई नेतृत्वको नयाँशक्तिबीच सोमबार (आज) एकता हुँदै छ।

गत शनिबार भएको सहमती अनुसार आज एकतालाई औपचारिकता दिन लागिएको हो । नयाँ दलमा डाक्टर भट्टराई संघीय परिषदको अध्यक्ष र उपेन्द्र यादव केन्द्रीय समितिको अध्यक्ष बन्नेछन् ।

३ सय सदस्यीय केन्द्रीय समिति बनाउने र समितिमा २ सय जना फोरमका र ९९ जना नयाँ शक्तिका केन्द्रीय सदस्य रहने सहमति दुवै दलले गरेका छन् ।

नयाँ बन्ने दलको नाम समाजवादी पार्टी नेपाल राख्ने सहमति भएको छ । नयाँ दलले फोरमकै झण्डा प्रयोग गर्ने पनि करिब निश्चित भएको छ । फोरमले रातो र हरियो पृष्ठभूमिमा सेतो तारा अंकित झण्डा प्रयोग गर्दै आएको छ ।

चुनाव चिह्नको विषयमा भने अझै निर्णय हुन सकेकाे छैन् । नयाँ शक्तिको देब्रे आँखालाई नै चुनाव चिन्हकाे रुपमा प्रयोग गर्ने की अन्य केहि लाई प्रयोग गर्ने भन्ने विषयमा छलफल जारी रहेकाे नेताहरुले जनाएका छन् । 
 
संघीय संसदमा फोरमका १६ र नयाँ शक्तिका १ सांसद छन् । यी २ दलबीच यसअघि पनि पार्टी एकता गर्ने सहमति भए पनि अन्तिम समयमा भाँडिएको थियो ।