अवतरणका क्रममा विमानमा आगलागी, ४१ को मृत्यु (भिडियोसहित)

रुसको मस्कोमा आपतकालीन अवतरण गर्ने क्रममा विमानमा आगो लाग्दा ४१ जनाको मृत्यु भएको छ।

सुखोई सुपरजे–१०० विमानमा आगलागी हुँदा दुईजना बालबालिका र एकजना विमान परिचारिकासहित ४१ जनाको मृत्यु भएको अन्तर्राष्ट्रिय सञ्चार माध्यमले जनाएका छन् ।
 
रुसको सरकारी मिडियाका अनुसार मस्कोबाट मारमास्क जादैँ गरेको उक्त विमानमा सवार चालक दलका ५ सदस्यसहित ७८ जना थिए । तीमध्ये ४१ जनाको मृत्यु भएको हो । ३७ जनालाई भने जीवितै उद्धार गरिएको छ।

चालक दलले यात्रुलाई जोगाउन सबै प्रयास गरेको बताउँदै ५५ सेकेन्डभित्र उनीहरूलाई निकालिएको जनाइएको छ ।

रुसको सरकारी विमान कम्पनी एयरोफ्लोटले प्राविधिक गडबडीका कारण विमान एयरपोर्टमा फर्कनुपरेको र अवतरणका क्रममा आगो लागेको अन्तर्राष्ट्रिय सञ्चार माध्यमले उल्लेख गरेका छन् ।

रूसी राष्ट्रपति भ्लादिमिर पुटिनलाई घटनाका वस्तुस्थितिबारे अवगत गराइएको छ । राष्ट्रपति पुटिनले पीडित परिवारप्रति समावेदना व्यक्त गरेका छन्।

विमानमा भएको आगलागीको लाइभ भिडियो हेर्न यो लिंकमा क्लिक गर्नुहोस् ।