सरकारको विरोधमा विद्यार्थी सडकमा

काठमाडौं – ११ विद्यार्थी संगठनले देशमा व्याप्त भ्रष्टाचारविरुद्ध प्रदर्शन गरेका छन्। पछिल्लो समय सरकार नै भ्रष्टाचारमा लागेको आरोप लगाउँदै विद्यार्थी संगठनहरु आन्दोलित बनेका हुन्। 

देशमा अराजकता र भ्रष्टाचार बढीरहेको भन्दै सरकारलाई खवरदारी गराउनका आन्दोलन गर्नुपरेको विद्यार्थी नेताहरुले जनाएका छन्। एनसेलबाट कर असुल्न नसक्नु, खुल्लामञ्च अतिक्रमण हुनु, बालुवाटारलगाएतका सरकारी जग्गा अतिक्रमण हुनु र यी सबै घटनामा सरकार निरिह देखिनुले जनतामा सरकारप्रति चरम निराशा छाएको विद्यार्थीहरु आन्दोलनमा उत्रिनु परेको नेपाल विद्यार्थी संघका नेता मोती भण्डारीले बताए। उनले विद्यार्थीसँग कलेजहरुले लिइरहेको चर्को शुल्क फिर्ता गर्नुपर्ने समेत आफूहरुको माग गरेको बताए। 

माइतीघरबाट सुरु भएको र्‍याली बानेश्वर पुगेर कोणसभामा परिणत भएको थियो। कोणसभालाई विभिन्न संगठनका विद्यार्थी नेताहरुले सम्बोधन गर्दै सरकारलाई सच्चि आग्रह गरेका थिए।