भारतमा डाबरका मह र गाईको घिउ बिक्रीमा रोक

काठमाडौं- भारतको खाद्य सुरक्षा तथा मापदण्ड प्राधिकरणले डाबर इन्डियालाई आफ्ना विभिन्न खाद्य उत्पादनमा भ्रामक रूपमा ‘शतप्रतिशत शुद्ध’ लगायतका दाबी प्रयोग गरेको भन्दै ती उत्पादनको बिक्री तत्काल रोक्न निर्देशन दिएको छ।

प्रतिबन्धमा डाबरको मह, गाईको घिउसहित अन्य केही खाद्य सामग्री पनि परेका छन्। साथै प्राधिकरणले कम्पनीसँग १५ दिनभित्र आदेश कार्यान्वयनबारे प्रतिवेदन पेश गर्न पनि निर्देशन दिएको छ।

प्राधिकरणका अनुसार डाबरको वेबसाइटमा बिक्री भइरहेका उत्पादनमा ‘शतप्रतिशत प्राकृतिक’, ‘शतप्रतिशत शुद्ध’, ‘शतप्रतिशत शुद्धताको प्रत्याभूति’, ‘शतप्रतिशत जैविक’ र ‘शतप्रतिशत नरिवलको पानी’ जस्ता दाबी गरिएको पाइएको थियो। यस्ता दाबी उपभोक्तालाई भ्रममा पार्ने, पुष्टि नभएका तथा खाद्य विज्ञापन तथा दाबीसम्बन्धी सन् २०१८ को नियमावलीविपरीत रहेको प्राधिकरणको निष्कर्ष छ।

अनुगमनका क्रममा डाबर हिमालयन जैविक स्याउको सिरका र डाबर जैविक महमा आवश्यक स्वीकृतिबिनै ‘जैविक भारत’ को चिन्ह प्रयोग गरिएको पनि भेटिएको छ। त्यस्तै, मिश्रित खाद्य पदार्थमा यस्तो दाबी गर्न नपाइने व्यवस्था हुँदाहुँदै डाबरको नरिवलको दूधलाई ‘शतप्रतिशत शुद्ध’ भनेर बजारमा बिक्री गरिएको प्राधिकरणले जनाएको छ।

प्राधिकरणले यसअघि पनि यस्ता भ्रामक दाबी तत्काल हटाउन डाबरलाई सूचना दिएको भए पनि कम्पनीले आवश्यक कदम नचालेपछि बिक्री रोक्ने आदेश जारी गरिएको हो। खाद्य विज्ञानअनुसार अधिकांश प्रशोधित वा प्याक गरिएका खाद्य पदार्थलाई वैज्ञानिक रूपमा ‘शतप्रतिशत शुद्ध’ प्रमाणित गर्न कठिन हुने भएकाले प्रयोगशालाबाट पुष्टि नभई यस्तो दाबी गर्नु कानुनविपरीत मानिने प्राधिकरणले जनाएको छ।