'विष्णु पौडेलसहित वालुवाटार प्रकरणका दाेषीलाई कारवाही गर'

धनगढी – नेपाली कांग्रेसको भातृ संगठन नेपाल तरुणदलले विभिन्न भ्रष्टाचार काण्डमा संलग्नलाई कारवाहीको माग गर्दै धनगढीमा प्रर्दशन गरेको छ। तरुणदलले निर्मला हत्यादेखि वाइडवडी खरिद, वालुवाटारको जग्गा खरिद प्रकरणमा संलग्नलाई कारवाहीको माग गरेको छ। 

धनगढी चौराहदेखि जिल्ला प्रशासन कार्यालयसम्म प्रर्दशन गरेको तरुणदलले प्रमुख जिल्ला अधिकारी मार्फत प्रधानमन्त्रीलाई ज्ञापन पत्रसमेत बुझाएको छ। ६ बुँदे ज्ञापन पत्रमा कञ्चनपुरकी १३ वर्षीया किशोरी निर्मला पन्तको हत्या भएको १० महिनासम्म दोषीको पहिचान गरी कारवाही नभएको घटनाप्रती आफूहरुको गम्भीर ध्यानाकर्षण भएको बताउँदै तरुणदलले न्यायको माग गरेको छ।


यस्तै सरकारले गर्ने भ्रष्टाचारका कारण समस्या भोग्नु परेको भन्दै राष्ट्रलाई शुन्य भ्रष्टाचारमा ल्याएर जनताको दैनिक जीवनलाई सरल र सहज बनाउन, वाइडवडी विमानमा भएको अबौँको भ्रष्टाचारको छानविन गरी दोषीलाई कारवाही गर्न माग गरिएको छ। एनसेलबाट राज्यले पाउनुपर्ने ७० अर्ब भन्दा बढि राजस्व तुरुन्त असुल गर्न  र वालुवाटारको सार्वजनिक जग्गा खरिद प्रकरणमा संलग्न नेकपाका महासचिव विष्णु पौडेल लगायतका व्यक्तिलाई कारवाही गर्न तरुणदलको माग छ।