जिउँदै जलाइएकी कञ्चनको मृत्यु

काठमाडौं – सिरहामा आगो लगाएर जलाइएकी २० वर्षीया कञ्चन मण्डल खत्वेको मृत्यु भएको छ। मण्डलको उपचारको क्रममा काठमाडौंमा मृत्यु भएको हो। कञ्चन विहिबार आफ्नै घरको आँगनमा जल्दै गरेको अवस्थामा भेटिएकी थिइन्।

बिहान करिब ११ बजे आँगनमै जल्दै गरेको अवस्थामा भेटिएकी उनको शरीरको ८० प्रतिशत भाग जलेको थियो। धरानस्थित वीपी कोइराला विज्ञान प्रतिष्ठानबाट थप उपचारको लागि काठमाडौं लगिएकी उनको उपचारको क्रमममा मृत्यु भएको हो।

घटनापछि कञ्चनका पति बेचन मण्डल फरार भएका छन् भने सासुलाई प्रहरीले नियन्त्रणमा लिएर अनुसन्धान अघि बढाएको छ। घरायसी विवादका कारण कञ्चनसँग यस्तो घटना भएको हुनसक्ने प्रहरीको आशंका छ।