भत्ता माग्दै इन्जिनियरले दिए सामूहिक राजीनामा

काठमाडौं – राष्ट्रिय पुनर्निर्माण प्राधिकरणका इन्जिनियरहरुले सामूहिक राजीनामा दिएका छन्। बिहीबार पत्रकार सम्मेलन गर्दै उनीहरुले सामूहिक राजीनामा दिएको घोषणा गरेका हुन्। 

भूकम्पपछिको पुनर्निर्माणमा जुटेका इन्जिनियरहरुले भत्तालगायतका सेवा सुविधा उपलब्ध गराउनुपर्ने आफूहरुको माग सरकारले सम्बोधन नगरेको भन्दै उनीहरुले सामूहिक राजीनामा दिएको घोषणा गरेका हुन्।

भत्तालगायतका सेवा सुविधा उपलब्ध गराउन माग गर्दै आएको नौं महिनासम्म पनि सरकारले नसुनेपछि ३२ जिल्लामा पुनर्निर्माणमा जुटेका इन्जिनियरहरु सामूहिक राजीनामा दिन बाध्य हुनु परेको राष्ट्रिय पुनर्निर्माण प्राधिकरण प्राविधिक राष्ट्रिय हक हित संरक्षण समितिका अध्यक्ष अविनाश अमरले जानकारी दिए।
 
प्राधिकरणका इन्जिनियरहरुले विगत नौ महिनायता कटौति गरिएको भत्तालगायतका सेवा, सुविधा उपलब्ध गराउन सरकारसँग माग गर्दै आन्दोलन गर्दै आएका थिए । सरकारले माग सम्बोधन गरे पुनर्निर्माणको काममा फर्कने उनीहरुले प्रतिबद्धतासमेत जनाएका छन्।