काठमाडौंको अनौठो मौसम बुझ्न विदेशबाट आए विज्ञहरु

काठमाडौं - नेपालको आयोजनामा सोमबारदेखि साउथ एसियन क्लाइमेट आउटलुक फोरम (सास्कोफ–१४) को १४ औं सम्मेलन काठमाडौंमा सुरु भएको छ। 

दक्षिण एसियाली मुलुकहरूमा यो वर्षको मनसुन प्रक्षेपण गर्न विभिन्न ८ देशका मौसमविद्हरु काठमाडौंमा भेला भएका छन्। हरेक वर्ष मनसुन सुरु हुनुभन्दा दुई महिनाअघि सम्मेलन गरी दक्षिण एसियाली मुलुकको मनसुन प्रक्षेपण गर्ने गरिएको छ । मौसमविदले गहन छलफल गरी यस वर्षको मनसुनबारे निष्कर्ष निकाल्ने बताइएको छ। 

ऊर्जा, जलस्रोत तथा सिँचाइमन्त्री वर्षमान पुनले उद्घाटन गरेको सास्कोफ–१४ सम्मेलनमा करिब ३० जना विशेषज्ञको सहभागिता रहेको छ। सम्मेलनमा नेपालसहित बंगलादेश, भुटान, भारत, माल्दिभ्स, म्यानमार, पाकिस्तान र श्रीलंकाका मौसमविदरु सहभागिता रहेको छ। सम्मेलनमा विश्व मौसम संगठन (डब्लूएमओ), बेलायतको मेटिरियोलोजी अफिसका विशेषज्ञ र मौसमबारे अध्ययन गर्ने विभिन्न अन्तर्राष्ट्रिय संघसंस्थाका प्रतिनिधिलगायत विज्ञहरु सहभागी छन्।