सामूहिक बलात्कारको आरोपमा ६ पक्राउ

धनगढी - कैलालीको घोडाघोडी नगरपालिका-४ मा १६ वर्षीया एक किशोरी माथि सामूहिक बलात्कार भएको छ।

नयाँ वर्षको दिन उक्त घट्ना भएको हाे। प्रहरीले घटनामा संलग्न भएको आशंकामा ६ युवकलाई पक्राउ गरिएको जनाएको छ। इलाका प्रहरी कार्यालय सुखडका अनुसार पक्राउ पर्नेमा घोडाघोडी-१ का केशव भनेर चिनिने राकेश गिरी, रुपेश चौधरी, लक्ष्मण रावल, हिमराज क्षेत्री, नरेन्द्र बिक र नवीन शाही रहेका छन्।

घट्ना बारे शनिबार मात्रै जाहेरी परेको प्रहरी निरीक्षक यक्षराज जोशीले जानकारी दिए। किरोशी आफन्तको विवाहमा जाने क्रममा घोडाघोडीको जङ्गलमा राकेश गिरीको समूहले किशोरीलाई इन्जेक्सन लगाई सामूहिक बलात्कार गरेको जाहेरीमा उल्लेख गरिएको प्रहरी निरीक्षक जोशीले बताए।

जाहेरीमा सात जनाको नाम किटान गरिएको छ। जस मध्ये एक जनाको खोजिकार्य भैरहेको प्रहरीले जनाएको छ। घटना लगतै पीडित किशोरीको घोडाघोडी अस्पतालमा उपचार हुन नसकेपछि नेपालगन्ज रेफर गरिएको र त्यहाँ पनि उपचार सम्भव नभएपछि अहिले काठमाडाैंमा उपचार भइरहेको जोशीले जानकारी दिए ।