चेन्‍नई पुगेका किशोरको उद्धार

काठमाडौं – रोजगारीका लागि भारतको चेन्‍नई जाँदै गरेका महोत्तरी, धनुषा, सिरहा र सर्लाही जिल्लाका २६ किशोरलाई भारतको विहार राज्यको बरियारपुर सीतामढीबाट उद्धार गरिएको छ। ललितपुरस्थित केन्द्रीय बाल कल्याण समिति, धनुषा जिल्ला बालकल्याण समिति, प्रदेश नं. २ सरकार र छोराछोरी नेपालको समन्वयमा ती किशोरलाई  बरियारपुर सीतामढीस्थित बालगृहबाट उद्धार गरिएको हो।

भारतीय सुरक्षा पदधिकारीले गत चैत १३ गते विभिन्न बसबाट ती किशोरलाई हिरासतमा लिएर  संरक्षणका लागि उक्त बालगृहमा राखेका थिए। केन्द्र्रीय बाल कल्याण समितिका कार्यक्रम अधिकृत सञ्जीव महतोका अनुसार उद्धार भएकामा  महोत्तरीका १२, धनुषाका ९, सिरहाका तीन र सर्लाहीका दुई  बालक छन्। बाह्र देखि १७ वर्षका ती किशोर चेन्नईमा राम्रो रोजगारी पाइन्छ भनी साथीहरूबाट सुनेकाले  त्यसतर्फ जान लागेको बताइएको छ। उद्धार गरिएका सबै बालक अशिक्षित  छन्।

उद्धार गरिएका बालक प्रवीण पासवानका अनुसार भारतीय सुरक्षाकर्मीले नागरिकता नहुनेलाई नियन्त्रणमा लिने र नागरिकता हुनेलाई चेन्नई जान दिने गरेका छन्। प्रमुख जिल्ला अधिकारी प्रदीपराज कँडेलले उद्धार गरिएका बालक अभिभावकलाई बुझाउँदै तिनलाई निगरानीमा राख्न सुझाव दिए। उनले रोजगारी दिने बहानामा बेहोस बनाएर मिर्गौला  निकाल्ने गरिएकाले आ–आफ्ना छोराको ख्याल गर्न पनि आग्रह गरे।