यौन हिंसाको आरोपमा वडा सचिव पक्राउ

धनगढी – कैलालीको घोडाघोडी नगरपालिका–४ का सचिव यज्ञ आचार्य बालिकामाथि यौन हिंसा गरेको आरोपमा पक्राउ परेका छन्। 

शुक्रबार राति बालिकाको घरमा गएर सचिव आचार्यले आमासँग झगडा गर्नुका साथै १२ वर्षीय छोरीमाथि यौन हिंसा गर्न खोजेपछि स्थानीयले राति नै नियन्त्रणमा लिएर प्रहरीलाई बुझाएको खुलेको छ।

बालिकाका काकाको निवेदनको आधारमा वडा सचिव आचार्यलाई नियन्त्रणमा लिएको र अनुसन्धान भइरहेको इलाका प्रहरी कार्यलय सुखडका प्रमुख यक्षराज जोशीले जानकारी दिए। उनले सचिव आचार्य बिरुद्ध जवर्जस्ती करणी उद्योगमा जाहेरी दिएको बताए। 

प्रहरी निरीक्षक जोशीले आचार्यसंग बुझ्दा उनले बालिकाको आमासँग रकमको लेनदेन भएकाले आफू रकम माग्न गएको बयान दिएको जानकारी दिए। थप अनुसन्धान भैरहेको उनले जानकारी दिए। बालिकाले भने आफूमाथि गालीगलौज गर्नुका साथै हातपात गर्न खोजेको बताएकी छिन्।