स्कुटीमै सुन तस्करी

भैरहवा - नेपाल–भारत सीमामा आइतबार राति एक किलो सुनसहित एक जना पक्राउ परेका छन्। सीमावर्ती नाका डन्डा हेड हुँदै भारततर्फ जाँदै गरेको लु ४२ प ७६१९ नम्बरको स्कुटीबाट एक केजी सुन बरामद गरेको भारतीय सीमा सुरक्षा बलका निरीक्षक विकास रायले बताए।

पक्राउ पर्नेमा भैरहवा निवासी धनवत अग्रवाल रहेका छन्। उनलाई अनुसन्धानका लागि भारतीय भन्सार कार्यालय नौतनवा पठाइएको छ। सशस्त्र प्रहरी बल नेपाल नं २७ गण हेड क्वार्टर कार्यालयअगाडिबाट दशगजातर्फ गएको स्कुटीमा उक्त अवैध सुन भेटिएको हो।

सुरक्षाकर्मीको आँखा छलेर कसरी दशगजा पारी पुग्यो भन्ने विषय रहस्यमय देखिएको छ। सशस्त्र प्रहरी बल नेपाल नं २७ गण हेड क्वार्टर रुपन्देहीका प्रमुख वसन्त कुमार बोगटीले भने, ‘हामीले चेकिङमा कडाइ गरेका छौं। तर, एक्स रे मेसिन नहुँदा राम्रोसँग चेकिङ हुन पाएको छैन।’

उनले प्रहरीले सीमा क्षेत्रमा निगरानी गर्न कुनै कसर बाँकी नराखेको बताए। भारतमा निर्वाचन भइरहेकाले पनि सीमावर्ती क्षेत्रमा कडाइ गरिएको छ।