‘बालुवाटार बेच्‍नेले सिंहदरबार पनि बेच्लान्, होसियार’!

काठमाडौं - प्रधानमन्त्री निवासकै जग्गा बिक्रि भएको भन्ने समाचार बाहिरिएपछि विवेकशील साझा पार्टीले सोमबार प्रधानमन्त्री निवासमा प्रदर्शन गरेको छ। रवीन्द्र मिश्र नेतृत्वको विवेकशील साझा पार्टीले प्रधानमन्त्री निवास अगाडि विरोध प्रदर्शन गरेको हो।

सरकारी जग्गा अपचलन हुन नदिन प्रधानमन्त्री निवास अगाडि विरोध प्रर्दशन गर्नु परेको पार्टीका प्रवक्ता सूर्यराज आचार्यले बताए। उनले यस्तो गम्भीर प्रकृतिको घटनाको विरोधमा उत्रिन सबै नागरिक समाज, पार्टी र संचारकर्मीहरुलाई आग्रह गरे। उनले सरकारलाई दवाव दिन विरोमा उत्रिएको बताए।

प्रधानमन्त्री निवासको जग्गा सत्तारुढ नेपाल कम्युनिष्ट पार्टी (नेकपा) का महासचिव विष्णु पौडेललेसमेत किनेको तथ्य बाहिर आएपछि विवेकशील साझा पार्टीले त्यसको विरोध गरेको हो।

उनीहरुले ‘बालुवाटार बेच्नेले सिंहदरबार पनि बेच्लान, होसियार’, ‘चर्को स्वरमा बोलौं, भ्रष्टाचारको पोल खोलौं’, ‘नेताहरुको सम्पत्ति छानबिन गर’, ‘ठूलो माछा कता छ ? सिंहदरबार जता छ’ । लेखिएका प्लेकार्डसहित प्रदर्शन गरेका थिए।