बैशाख २ लाई  भर्ना अभियान दिवस घोषणा गर्दै सरकार

काठमाडौँ- नयाँ वर्ष प्रारम्भ भएसँगै भोलि सोमबारबाट देशैभर विद्यार्थी भर्ना अभियान चलाइदैछ ।  भर्ना अभियानलाई शसक्त बनाउन सरकारले बैशाख २ गतेलाई  ‘राष्ट्रिय भर्ना अभियान दिवस’ को रुपमा घोषणा गर्ने तयारी गरेको छ । 

अभियानको नारा ‘हाम्रो सहर, हाम्रो गाउँ, सबै बालबालिकालाई विद्यालय पुर्‍याऊँ’ तय गरिएको छ । केन्द्रीय नारामा स्थानीय सरकारले आफ्नो परिवेशअनुसार थपघट गर्न सक्ने जनाइएको छ । 

शिक्षा विभागले भर्ना अभियान दिवस घोषणाको तयारी पुरा गरिएको र स्थानीय तहलाई पनि परिपत्र गरिएको जनाएको छ । संविधानले विद्यालयहरुको सञ्चालन र संरक्षण गर्ने जिम्ममा स्थानीय तहलाई दिएको छ । 

१५ वर्षदेखि विद्यार्थी भर्ना अभियान जारी छ । मन्त्रालयका सहप्रवक्ता विष्णुप्रसाद मिश्रका अनुसार भर्ना अभियानका निम्ति मानव विकास सूचकांकमा पछाडि रहेको १५ जिल्लालाई २० लाख रुपैयाँका दरले रकम दिइनेछ । अन्य जिल्लालाई भने ५० हजार रुपैयाँका दरले बजेट विनियोजन गरिएको छ ।