जनकपुरधाम– प्रदेश २ सरकारले संघीय सरकारलाई विपक्षी बनाएर दायर गरेका विभिन्न मुद्दामा शुक्रबार सर्वोच्च अदालतले कारण देखाउ आदेश जारी गरेको छ।
प्रहरी समायोजन, कर्मचारी समायोजन, फौजदारी मुद्दाको क्षेत्राधिकार र भूमिगत सिँचाइ कार्यालयको हस्तान्तरणका सम्बन्धमा दायर मुद्दामा सर्वोच्चको संवैधानिक इजलासले कारण देखाउ आदेश जारी गरेको हो।
करिब एक वर्षपछि यी मुद्दामा सर्वोच्चले संघीय सरकारलाई कारण देखाउ आदेश जारी गरेको प्रदेश २ का मुख्य न्यायाधिवक्ता दीपेन्द्र झाले जानकारी दिए।
प्रदेश सरकारले अधिकार क्षेत्रको विषयलाई लिएर ०७७ भदौ २० गते, ३० गते र मंसिर १८ गते गरी तीन चरणमा संघीय सरकारविरुद्ध सर्वोच्चमा रिट दर्ता गराएको थियो।