आठौँ खेलकूदलाई गर्मीको चुनौती

काठमाडौं- पश्चिम तराईमा गर्मी शुरु भइसकेको छ । यहीबेला राष्ट्रिय खेलकूद परिषद्ले प्रदेश नं. ५ मा आठौँ राष्ट्रिय खेलकूद प्रतियोगिता आयोजना गर्दैछ । जब तराईमा गर्मी शुरु भयो तब प्रतियोगिता आयोजना गरिएको छ । तराईमा दिनप्रतिदिन गर्मी बढिरहेको छ । 

राखेपले त्यही गर्मीमा प्रतियोगिता किन आयोजना गर्दैछ भन्ने चर्चा शुरु भएको छ । विशेषगरी बाँके, बर्दिया र दाङमा देशकै बसै भन्दा बढी गर्मी हुने क्षेत्रका रुपमा चिनिन्छन् । 

‘गर्मीले गर्दा खेलाडी प्रतियोगितामा सहभागी हुन चासो देखाउँदैनन् । गर्मीले अभ्यास गर्न कठिनाइ हुने त भइहाल्यो, त्यो भन्दा पनि खेलस्थलमा हुने अत्याधिक गर्मीको बेला राष्ट्रिय प्रतियोगिता गरिएको छ । यसले खेलाडीलाई निकै चुनौती छ’, सातौँ राष्ट्रिय खेलकुदकी एथलेटिक्समा स्वर्ण पदक विजेता विश्वरुपा बुढाले भनिन् । 

प्रतियोगितामा आफ्नो प्रतिभा देखाउन पाउनु नै खेलाडीका लागि ठूलो अवसर रहेकाले गर्मीसँग जुधेरै भए पनि खेलमा सफलता हासिल गर्नुपर्ने उनको भनाइछ । खेलाडीका लागि प्रतियोगिता हुनु ठूलो कुरा हो, घाम, पानी, चिसो जस्तोसुकै मौसममा पनि खेल्न सक्नुपर्छ । 

तर, ती खेलाडीले गर्मीका कारण आफ्नो सोचे अनुसारको प्रदर्शन गर्न नसक्नुले खेलाडीको खेल जिवनमा असर पार्छ या पार्दै ? त्यसको खोजी हुन जरुरी छ । एथलेटिक्सका प्रशिक्षक चन्द्रबहादुर गुरुङले गर्मीले प्रतियोगितामा चुनौती आउने तर असर नपर्ने बताए । 

‘गर्मीमा केही चुनौती आउन सक्छन्, तर गर्मीले असर नै गर्छ भन्ने होइन’, एथलेटिक्स प्रशिक्षक गुरुङले भने । तर, खेलाडीले ३३ डिग्रीको तापक्रममा पुरानो रेकर्डलाई ब्रेक गर्दै नयाँ रेकर्ड कायम गर्न सक्लान? 

प्रतियोगितामा दुई हजार ८२५ पुरुष र दुई हजार ३८६ महिला गरी पाँच हजार २११ खेलाडीबीच रोमाञ्चक प्रतिष्पर्धा हुनेछ । सो खेलकूद भव्य रुपमा सफल बनाउन ६४० प्रशिक्षक र ४६१ टिम व्यवस्थापकलाई भ्याइनभ्याई छ । खेलकूदका लागि ९२२ राष्ट्रिय तथा अन्तर्राष्ट्रिय निर्णायक र ४७१ स्थानीय निर्णायक छनोट भइसकेका छन् । राष्ट्रिय खेलकूद परिषद् (राखेप)का अनुसार खेलाडीले ३७२ स्वर्ण, ३७२ रजत र ५६३ काश्यका लागि प्रतिष्पर्धा गर्नेछन् ।

व्यक्तिगत विधामा स्वर्ण विजेताले १५ हजार र सामूहिकतर्फको विजेताले सात हजार पाउनेछन् भने राष्ट्रिय कीर्तिमान भङ्ग गर्नेले २५ हजार पाउनेछन् । प्रतियोगितामा सात प्रदेश, तीन विभागीय टिम त्रिभुवन आर्मी क्लब, एपीएफ क्लब, नेपाल पुलिस क्लब र एक एनआरएनए टिमका खेलाडीले प्रतिष्पर्धा गर्नेछन् । प्रतियोगिताको नेपालगञ्ज रङ्गशालामा वैशाख ५ गते उद्घाटन र वैशाख ११ गते समापन हुनेछ