ओलम्पिक छनोट : नेपालको सुखद अन्त्य

काठमाडौं- दोस्रो चरणको ओलम्पिक छनोटमा नेपाली राष्ट्रिय महिला फुटबल टोलीले सुखद अन्त्य गरेको छ । मंगबार भएको खेलमा नयाँ प्रतिद्वन्द्वी राष्ट्र इन्डोनेसियालाई २-१ गोल अन्तरले पराजित गर्दै नेपालले प्रतियोगितामा सुखद अन्त्य गरेको हो । 

सुरुवाती दुई खेल गुमाउँदै छनोटको तेस्रो चरणमा पुग्ने सम्भावना समाप्त पारेको नेपालले आफ्नो तेस्रो खेलमा प्रतिस्ठाको जित निकालेको हो । नेपालले इन्डोनेसियासँग पहिलो पटक प्रतिस्पर्धा रगेको हो । 

इन्डोनेसियासँग पहिलो हाफ १-१ को बराबरी खेलेको थियो । पहिलो हाफमा नेपालका लागि स्ट्राइकर सावित्रा भण्डारीले गोल गरेकी हुन् । त्यस्तै दोस्रो हाफमा सावित्राले नै व्यक्तीगत दोस्रो गोल गर्दै नेपालको सुखद अन्त्य गराइन् । 

नेपालले प्रतियोगिताको पहिलो खेलमा आयोजक म्यानमारसँग ३-१ गोल अन्तरले पराजित भएको थियो । त्यस्तै दोस्रो खेलमा पनि चिरपरिचित भारतसँग ३-१ ले पराजित भएको थियो । 

छनोटको समूह ‘ए’मा रहेको नेपालले तीन अंक जोड्यो । समूह ‘ए’बाट आयोजक म्यानमार र भारत तेस्रो चरणमा प्रवेश गरेका छन् । यता नेपाल र इन्डोनेसिया छनोटबाट बाहिरिएका छन् ।