एक लाख बिरामी उपचारबाट बञ्चित, सरकार माैन

काठमाडौं- राजधानीबाट प्रकाशित सोमबारका राष्ट्रिय दैनिक अखबारहरुले चार दिनदेखि सरकारी चिकित्सकहरुले अस्पताल ठप्प बनाएको विषयलाई मुख्य समाचार बनाएका छन् ।
 
कर्मचारी समायोजनको विरोधमा चिकित्सकले गरेको आन्दोलनका कारण सरकारी अस्पतालका आपतकालिन बाहेकका सबै सेवा चार दिनदेखि ठप्प छ । दिनमा ४५ हजार आउने सरकारी अस्पतालमा ओपीडि मात्रै होइन महिनौ अघि तय भएका अप्रेसन पनि रोकिएका छन् । शुक्रबारदेखि चिकित्सकहरुले गरेको हड्ताल खुलाउन सरकारले भने सामान्य पहल पनि गरेको छैन् ।
 
यसै विषयलाई मुख्य समाचार बनाउँदै आजको नयाँ पत्रिका दैनिकले सरकारी अस्पताल ठप्प, सरकार मौन शीर्षकमा खबर लेखेको छ ।

उसले लाखौँ विरामीको बिचल्ली हुँदा समेत सरकार मौन बसेको उल्लेख गरेको छ । अस्पतालको हड्तालका विषयमा प्रधानमन्त्री केपी शर्मा ओली अहिलेसम्म मौन छन् भने स्वास्थयमन्त्री उपेन्द्र यादव आफूलाई यसबारे जानकारी समेत नभएको जलास्पद जवाफ दिएर बसेको नयाँ पत्रिकाले लेखेको छ ।
 
कान्तिपुर दैनिकले भने १ लाखले पाएनन् उपचार शीर्षकमा मुख्य समाचार छापेको छ ।

संसारभर आइतबार विश्व स्वास्थ्य दिवस मनाइरहँदा नेपालमा सरकारी चिकित्सकको आन्दोलनका कारण १ लाख बढि बिरामी उपचारबाट  बञ्चित भएको समाचारमा जनाइएको छ । यसै पनि मुलुकमा १५ हजार चिकित्सक अपुग छन् भने स्वास्थ्य क्षेत्रमा राज्यको लगानी ४ प्रतिशत मात्रै छ ।
 
आजको अन्नपूर्ण पोस्ट्ले बिरामीको बिचल्ली शीर्षकमा मुख्य समाचार लेखेको छ भने नागरिक दैनिकले चिकित्सक समायोजनः मर्कामा सुदूरपश्चिम शीर्षकमा खबर छापेको छ ।
 
यो विषय बाहेक आजको नागरिक दैनिकले नेकपाको एकीकरण विवाद मिलाउन दुई अध्यक्ष केपी शर्मा ओली र पुष्पकमल दाहाल प्रचण्डले असन्तुष्ट पक्षसँग बेग्लाबेग्लै भेट गर्न थालेको विषयलाई पनि महत्वका साथ छापेको छ ।

आइतबार माधव नेपाल, बामदेव गौतम लगायतका नेतालाई एक्ला एक्लै भेटेर विवाद मिलाउने प्रयास थालेको समाचारमा उल्लेख छ । यसै विषयलाई नयाँ पत्रिकाले पनि पहिलो पृष्ठमा छापेको छ ।
 
कान्तिपुर दैनिकले भने तारागाउँ रिजेन्सी छानविनले सरकारी जग्गा होटल हायातले कब्जा गरेको निष्कर्ष निकालेको विषयलाई प्राथमिकता साथ प्रकाशित गरेको छ । संसदीय छानविन उपसमितिले हायातले हडपेको १५० रोपनी जग्गा फिर्ता गर्नु र अख्तियारले अनियमितता छानविन गर्नु भनेर निर्देशन दिएको समाचारमा जनाएको छ ।
 
अन्नपूर्ण पोस्ट्ले भने बर्डफ्लुको विषयलाई महत्वका साथ छापेको छ । उसले भारतबाट अवैध रुपमा भित्रिने कुखुराका कारण बर्डफ्लु भित्रिने गरेको र लेयर्स कुखुरामा पनि संक्रमण देखिएको विषयलाई समाचार बनाएको छ ।