अफगान युद्ध, २० वर्षमा कति मारिए?

काठमाडौं-  सन् २००१ मा तालिबान समूहविरुद्धको युद्ध सुरु भएयता अफगानिस्तानमा कम्तीमा एक लाख ७७ हजार मानिसको ज्यान गएको छ। अमेरिकी गठबन्धनका तर्फबाट ३,५०० जनाले ज्यान गुमाएका छन्। तीमध्ये २,३०० भन्दा बढी अमेरिकी छन्। बेलायतका ४५० भन्दा बढी सैनिक मारिएका छन्। थप २०,६६० अमेरिकी सैनिक घाइते भएको तथ्यांक छ। 

अफगान सुरक्षा फौज र गैरसैनिक हताहत भएको तुलनामा उक्त सङ्ख्या थोरै हो। राष्ट्रपति गनीले सन् २०१९ मा अफगान सुरक्षा निकायका ४५,००० सदस्य आफू राष्ट्रपति निर्वाचित भएको पाँच वर्षयता मारिएको बताएका थिए। सन् २०१९ मा ब्राउन युनिभर्सिटीले गरेको अध्ययनले युद्ध सुरु भएयता अफगानिस्तानको राष्ट्रिय सेना र प्रहरी गरी ज्यान गुमाउनेको अनुमानित सङ्ख्या ६४,१०० जनाएको छ।

राष्ट्रसङ्घको अफगानिस्तानस्थित सहयोग मिसनका अनुसार सन् २००९ यता उसले व्यवस्थित रूपमा गैरसैनिकसम्बन्धी तथ्यांक राख्न थालेयता झन्डै एक लाख ११ हजार सर्वसाधारण नागरिक हताहत भएका छन्। यसमा सन् २००१ देखि २००८ सम्मको तथ्यांक भने समावेश छैन।