आजबाट एसईई सुरु, करिश्मा र शान्ता चौधरी पनि सामेल

काठमाडौँ- यस वर्षको माध्यमिक शिक्षा परीक्षा अर्थात् एसइई परीक्षा आजदेखि शुरु भएको छ ।  आज पहिलो दिन अङ्ग्रेजी विषयको परीक्षा भएकाे छ।

परीक्षा नियन्त्रण कार्यालय सानोठिमीका परीक्षा नियन्त्रक विष्णु अधिकारीका अनुसार यस वर्षको एसइई परीक्षामा देशभरबाट कूल चार लाख ७५ हजार तीन परीक्षार्थी परीक्षामा सहभागी भएका छन् ।

यस वर्षदेखि पहिलो पटक संघीय संरचनाको स्वरुपअनुसार परिक्षा सुरु भएको हो । परिक्षा यही चैत २१ गतेसम्म सञ्चालन हुने छ । परीक्षामा नियमित, ग्रेडवृद्धि र प्राविधिक धारका परीक्षार्थी पनि सहभागी भएका छन् । 

नायिकादेखि सांसदसम्म एसईईमा 

नायिका करिष्मा मानन्धर र नेकपाकी सांसद शान्ता चौधरी पनि एसईई परिक्षामा सामेल भएका छन् ।
 
नायिका मानन्धरले विद्यालयको नियमित विद्यार्थीका रूपमा डिल्लीबजारस्थित विजय स्मारक मावि केन्द्रबाट परीक्षा दिँदैछिन् । ४५ वर्षीया अभिनेत्री कक्षा ८ देखि काठमाडौं मैतीदेवीस्थित त्रिवेणी माविको नियमित विद्यार्थी भएर पढेकी थिइन् ।
 
यस्तै नेकपाकी सचेतक शान्ता चौधरी पनि गृहजिल्ला दाङको तुल्सीपुरबाट एसईई परिक्षामा सहभागी भएकी छिन् । खुला विद्यालय प्रणालीमा पढेकी प्रतिनिधिसभा सांसद ३८ वर्षीया चौधरीले सेन्टर मावि तुल्सीपुर केन्द्रबाट जाँच दिँदैछिन् । 

१८ वर्ष कमलरी बसेकी शान्ताले दाङको महेन्द्र माविमा ८ कक्षामा भर्ना भएर पढ्न थालेकी थिइन् । उनी एमालेबाट २०६४ र २०७४ मा दुईपल्ट सांसद भएकी हुन् । उनकी १७ वर्षीया छोरी बिनुले पनि यही वर्ष सिर्जना बाल विद्यालय काठमाडौंबाट एसईई दिँदैछिन्।