'समय आए पार्टी नेतृत्व लिन तयार छु'

सिन्धुली– नेपाली काङ्ग्रेसका वरिष्ठ नेता रामचन्द्र पौडेलले आफु पार्टी नेतृत्व लिन तयार रहेको बताएका छन्। नेपाल प्रेस युनियन सिन्धुलीले शनिबार आयोजना गरेको पत्रकार सम्मेलनमा नेता पौडेलले समय आए आफु नेतृत्व लिन तयार रहेको बताएका हुन्। उनले भने, 'मैले अहिले पार्टी नेतृत्वभन्दा पनि पार्टीमा देखिएको गुटको अन्त्य र पार्टीलाई बलियो बनाउने विषयलाई प्राथमिकतामा राखेको छु। समय आए नेतृत्व लिनसमेत तयार छु।'

सरकारका कामकारबाहीले लोकतन्त्रलाईनै खतरामा पारेकोले त्यसको प्रतिवाद गर्ने उनले चेतावनीसमेत दिए। सरकारले दुई तिहाई बहुमतको दम्भ देखाइरहेको आरोप नेता पौडेलले लगाए। अहिलेको कम्युनिष्ट सरकार शक्ति केन्द्रीकरण गर्नतर्फ लागेकाले लोकतन्त्र खतरामा परेको उनले बताए। 'सरकार बहुमतको आडमा शक्ति केन्द्रीकरण गर्न अग्रसर भएको छ। यसको प्रतिवाद गर्न आवश्यक छ।' उनले भने।

उनले एउटा राजा हटाए पनि नेकपा सरकारमा थुप्रै छोटेराजाहरु हाबी भएको भन्दै उनीहरुसँग लड्न कठिन भएको बताए। नेता पौडेलले नेकपाको वर्तमान सरकारसँग ‘ओरल्ली’, ‘मोरल्ली’ र ‘पोलिटिकल्ली’ लडाइँ लड्नु पर्ने बताए।

सरकारको एक वर्ष पूर्ण असफल भएको बताउँदै उनले ठूला आयोजना, सेनाको अधिकार र न्यायिक निकायको अधिकार सरकारले आफ्नो साथमा लिँदा लोकतन्त्र नै खतरामा परेको दाबी गरे।

विप्लव समूहलाई सरकारले प्रतिबन्ध लगाउनु गलत भएको नेता पौडेलको भनाइ छ। कुनै पनि समूहलाई दबाबमा राख्न खोजे त्यसले मुलुकको शान्ति र लोकतन्त्रलाईनै खतरामा पार्न सक्ने उनको भनाई छ। राष्ट्रियता र लोकतन्त्र कमजोर हुने विषयमा जनमत संग्रह गर्न नसकिने नेता पौडेलको भनाइ छ।