नवनियुक्त प्रदेश प्रमुख मिश्रलाई जनकपुर विमानस्थलमा भव्य स्वागत

जनकपुरधाम– प्रदेश २ का नवनियुक्त प्रदेश प्रमुख हरिशंकर मिश्रलाई जनकपुरधाम विमानस्थलमा भव्य स्वागत गरिएको छ। मंगलबार शपथ ग्रहणपछि आज जनकपुर आइपुगेका प्रदेश प्रमुख मिश्रलाई विमानस्थलमा भव्य स्वागत गरिएको हो। 

प्रदेश प्रमुखको स्वागतका लागि प्रदेश २ का भौतिक पूर्वाधार विकासमन्त्री रामसरोज यादवका साथै सयौँ कांग्रेसी कार्यकर्ताहरु विमानस्थल पुगेका थिए। उनलाई मन्त्री यादवले माला लगाएर स्वागत गरेका थिए। 

विमानस्थलमा स्वागतपछि प्रदेश प्रमुख मिश्र प्रदेश प्रमुखको कार्यालय पुगेर पदभार समेत ग्रहण गरेका छन्। 

मिश्रलाई सोमबार मन्त्रीपरिषदले गरेको सिफारिसका आधारमा राष्ट्रपति विद्यादेवी भण्डारीले मंगलबार प्रदेश २ को प्रदेश प्रमुखमा नियुक्त गरेकी थिइन्। मंगलबार साँझ नै प्रदेश प्रमुख मिश्रले शपथ समेत ग्रहण गरेका थिए। पदभार ग्रहण गर्दै प्रमुख मिश्रले अब शान्ति र अमनचयनका लागि काम गर्नुपर्ने आवश्यकता रहेको बताउँदै प्रदेश सरकारसँग समन्वय र सहकार्य गरेर अगाडि बढ्ने बताए ।

आफू नेपाली कांग्रेसबाट प्रदेश प्रमुखमा नियुक्त भए पनि अब कुनै पार्टीको व्यक्ति नभएको उनले बताए। भने, ‘अब म समग्र देशको मान्छे हुँ, कुनै पार्टीको मान्छे होइन। अब समग्र देशका लागि काम गर्छु।’