भारत-पाक युद्धको खतरासँगै नेपालमा पनि सुरक्षा सतर्कता

काठमाडौं- भारत पाकिस्तानबीच तनाव बढ्दै गएपछि नेपालमा उच्च सुरक्षा सतर्कता अपनाइएको छ।

भारत र पाकिस्तानबीच मंगलबार आक्रमण भएपछि काठमाडौंलगायतका सिमावर्ती सहमा सुरक्षा सतर्कता अपनाइएको हो। भारतीय वायुसेनाले मंगलबार बिहानै पाकिस्तानमा बम प्रहार गरे लगत्तै दुई देशबीच तनाव बढेको छ र दुवैतिर युद्धको मनस्थिति हावी भएको छ। 

युद्धका लागि दुवै तर्फबाट विभिन्‍न बाहनामा नेपाली भूमि प्रयोग हुनसक्‍ने खतरालाई ध्यानमा राखेर सुरक्षा सतर्कता अपनाइएको गृह मन्‍त्रालयका एक अधिकारीले बताएका छन्। यसबारेमा गृह मन्‍त्रालयमा म‌ंगलबार सुरक्षा निकायका अधिकारीसहित अनौपचारिक छलफल गरिएको थियो। 

भारत पाकिस्तान तनावलाई लक्षित गरी कुनै पनि घुसपैठ हुन दिनका लागि स्थानीय प्रशासन र सुरक्षा निकायलाई चनाखो अवस्थामा रहन र वस्तुस्थितिको सुक्ष्म अध्ययन गर्न सर्कुलर गरिएको छ। खासगरी त्रिभुवन अन्तरराष्ट्रिय विमानस्थल र अन्य विमानस्थलमा पनि सुरक्षा जाँचलाई कडा तुल्लाइएको छ। 

विवादित जम्मु कश्मिरमा मंगलबार दिनभर र रातभर पनि  भिडन्त भएको छ । दुई हप्ताअघि जम्मु कश्मिरको पुलवामामा पाकिस्तानी आतंकवादीले भारतीय ४७ सुरक्षाकर्मी मारेपछि भारत पाकिस्तान सम्बन्धले जटिल रुप लिएको हो।भारतले बायुयान प्रयोग गरी ३ सय बढी पाकिस्तानी आतंकवादी लडाकु मारेको दाबी गरेको छ।