ढल्केबरमा बस र ट्रक ठोक्कियो, २ को मृत्यु

जनकपुरधाम- धनुषाको ढल्केबरमा बस र ट्रक एक आपसमा ठोक्किदा दुई जनाको मृत्यु भएको छ भने २० जना घाइते भएका छन् । काकडभित्ताबाट गौर तर्फ आउँदै गरेको ना ५ ख ४१६ नम्बर बस र हेटौंडाबाट पूर्व तर्फ गइरहेको ना ६ ख ९४२१ नम्बरको ट्रक बुधबार बिहान एकआपसमा ठोक्किएको हो । 

दुर्घटनामा परि  भारत मोतिहारी बस्ने २५ वर्षीय उदेश ठाकुर र धनुषाको क्षिरेश्वरनाथ नगरपालिका महेन्द्रनगरकी शिवदेवी मण्डलको मृत्यु भएको छ । ठाकुरको घटनास्थलमै र मण्डलको उपचारका लागि धरान लैजादै गर्दा मृत्यु भएको जिल्ला प्रहरी कार्यालय धनुषाले जनाएको छ । मृतक दुबै जना बसमा सबार थिए भने घाइते पनि बसकै यात्रुहरु मात्रै भएको प्रहरीले बताएको  छ। 

दुर्घटनामा परि घाइते भएका २० जना लालगढको निजी अस्पतालमा उपचार भइरहेको छ । दुर्घटना तिब्र गतिका कारण भएको प्रहरीको अनुमान छ ।