पार्किङ गर्नेक्रममा बोलेरोको ठक्करबाट २ महिलाको मृत्यु

धादिङ- धादिङको गल्छीमा बोलेरो जीपको ठक्करबाट दुईजनाको मृत्यु भएको छ । 

आइतबार राति बा २० च ६२२१ नंको बोलेरो जिपले किचेर गल्छी गाउँपालिका- ४ की ३५ वर्षीया जमुना भुजेल र वडा नं ५ की ४६ वर्षीया कान्छी तामाङको मृत्यु भएको हो ।

उक्त जिप पार्किङका लागि सडक छेउमा राख्न लाग्दा पसलको अगाडि गफ गरीरहेका तीन जनालाई किचेको जिल्ला प्रहरी कार्यालयका सूचना अधिकारी प्रहरी नायब उपरीक्षक प्रकाश विष्टले जानकारी दिए । 

भुजेलको घटनास्थलमै र तामाङको उपचारका क्रममा मृत्यु भएको विष्टले बताए । घटनामा घाइते भएकी गल्छी-५ की ३६ वर्षीया धनकुमारी तामाङको पाटन अस्पतालमा उपचार भइरहेको छ ।

तीनजना गफ गरेर बसेका बेला पार्किङ गर्ने क्रममा जीपले ठक्कर दिएको थियो । चालकले गाडी पार्किङ गर्न खोज्दा उनीहरुलाई ठक्कर दिएको प्रहरीले जनाएको छ । ठक्कर दिने गाडीका चालक फरार रहेको र उनको खोजी कार्य तिब्र पारिएको प्रहरीले बताएको छ ।