बलात्कारको अभियोगमा तीनजना पक्राउ

जनकपुरधाम – जर्बजस्ती करणी गरेको आरोपमा प्रहरीले सप्तरीबाट तीन जनलाई पक्राउ गरेको छ। बलात्कारको दुई छुट्टाछुट्टै घटनामा प्रहरीले उनीहरुलाई पक्राउ गरेको हो।

एक ३० वर्षीया महिलालाई जबर्जस्ती करणी गरेको आरोपमा प्रहरीले सप्तरीको रुपनी गाउँपालिका–१ बस्ने ३८ वर्षीय देवेन्द्र यादवलाई पक्राउ गरेको छ। शनिबार साँझ आफ्नै छिमेकी एक महिलाको घरमा छिरी बलात्कार गरेको अभियोगमा यादवलाई पक्राउ गरिएको प्रहरीले जनाएको छ।

यसैगरी सप्तरीकै कञ्चनरुप नगरपालिका–५ घर भएकी एक २० वर्षीया युवतीलाई सामूहिक बलात्कार गरेको आरोपमा प्रहरीले अन्य दुई जनलाई पक्राउ गरेको छ।

पक्राउ पर्नेमा सोहि ठाउँ बस्ने भीम मुखिया र भरत मुखिया रहेको प्रहरीले जनाएको छ। बोल्न नसक्ने ती युवतीलाई दुबैजनाले कोशी टप्पु वन्यजन्तु आरक्ष क्षेत्रको जंगलमा लगी सामूहिक बलात्कार गरेको प्रहरीले जनाएको छ। पक्राउ परेका तीनै जनाउपर आवश्यक अनुसन्धान भइरहेको सप्तरी प्रहरीले जनाएको छ।