सुचना पाएर पनि प्रहरी निष्कृय हुँदा एनसेलमा विस्फोट

काठमाडौं- राजधानीबाट प्रकाशित आइतबारका राष्ट्रिय दैनिक अखबारहरुले विविध विषयका खबरलाई पहिलो प्राथमिकतामा पारेका छन् ।

नागरिक र कान्तिपुर दैनिकले एक जनाको ज्यान जाने गरि एनसेल टावरमा भएको विस्फोट र त्यसले निम्त्याएको सुरक्षा चुनौतीको विषयलाई मुख्य समाचार बनाएका छन् । ललितपुरमा भएको विस्फोटमा परि एक जनको मृत्यु भएको छ भने दुई जना घाइते भएका छन् । 

ललितपुरलगायत एकैपटक कम्तीमा १० जिल्लाका एनसेल टावरमा एकैदिन शृंखलावद्ध वम विस्फोट र आगजनीले सुरक्षा चुनौती बढाएको छ ।

नागरिक दैनिकमा प्रकाशित समाचार अनुसार प्रहरीको एक युनिटलाई विस्फोट बारे सुचना थियो । 

काठमाडौं, ललितपुरलगायत मुलुकका विभन्न स्थानमा नेत्रविक्रम चन्द नेतृत्वको नेकपाले विस्फोट गराएर आतंक मच्याउँदैछन् भन्ने सूचना प्रहरी प्रधान कार्यालयको एउटा युनिटलाई एक साताअघि सूचना आएको थियो । त्यो युनिटले काठमाडौं, भक्तपुर, ललितपुरका प्रहरी प्रमुखलाई यसबारे जानकारीसमेत गराएको थियो ।

त्यसैअनुसार तीनटै जिल्लाका प्रमुखले केही दिनसम्म खोजतलास गरे तर सुराक फेला पार्न नसकेपछि प्रहरी निस्क्रिय जस्तै भएका बेला शुक्रबार साँझ ललितपुरलगायत विभिन्न जिल्लामा बम विस्फोट भयो । काठमाडौंमा भने बम विस्फोट हुने अवस्था आएन। नेपाली सेनाको टोलीले त्यसलाई निस्क्रिय बनाएको थियो । मुुलुकका विभिन्न भागमा विस्फोट गराइँदै छ भन्ने सूचनालाई प्रहरीको कुनै पनि संयन्त्रले गम्भीरतापूर्वक नलिएको समाचारमा उल्लेख छ ।

नयाँ पत्रिकाले मेलम्ची खानेपानी आयोजनाको नालीबेलीलाई प्रमुखताका साथ छापेको छ । २० वर्षमा १९ प्रधानमन्त्री, २४ मन्त्री र २९ आयोजना प्रमुख फेरिए तर, मेलम्चीको पानी काठमाडौं आएन शीर्षकमा खबर लेखेको नयाँ पत्रिकाले ४२ अर्ब सकिए पनि अझै १० प्रतिशत काम बाँकी रहेको समाचारमा उल्लेख गरेको छ ।

अन्नपूर्ण पोस्ट्ले भने तराइ मधेशमा साहुले ऋणको जमानीका रुपमा नागरिकता राख्ने र खोस्ने गरेको  विषयलाई मुख्य समाचार बनाएको छ । उसले बाउको नागरिकता साहुकहाँः ऋण चुक्ता गर्न नसके अनागरिक शीर्षकमा खबर लेखेको छ । 

कारोबार दैनिकले भने वन लगानी कार्यक्रममा विश्व बैंकले थप पौने ६ अर्ब लगानी सहयता रकम उपलब्ध गराउने विषयलाई मुख्य समाचार बनाएको छ । यस्तै उसले माथिल्लो तामाकोशी जलविद्युत आयोजनाले आठ महिनाभित्र परीक्षण उत्पादन थाल्ने खबरलाई पनि प्राथमिकताका साथ प्रकाशित गरेको छ ।