जनकपुरधाम- प्रदेश २ को प्रदेश प्रमुखबाट पदमुक्त भएका डा. राजेश झा अहिराजले राष्ट्रपति विद्यादेवी भण्डारी र पूर्व प्रधानमन्त्री केपी शर्मा ओलीलाई धन्यवाद दिँदै कार्यालय छोडेका छन्।
प्रधानमन्त्री शेरबहादुर देउवा सरकारको सिफारीसमा प्रदेश २ प्रमुखमा हरिशंकर मिश्र नियुक्त भएपछि उनी बुधबार कार्यालय तथा आवासबाट बिदा भएका हुन्।
झाले आफ्नो छोटो कार्यअवधिमा प्रदेश प्रमुखको पद निस्कृय नरहेको सन्देश दिँदै आम नागरिकसँग घुलमिल भएर काम गर्ने अवसर पाएको बताए। उनले आफू पदभार ग्रहण गर्दा ‘शिरमा देश र मनमा मधेश’ लाई राखी कार्य गर्नेछु भनि प्रतिबद्धता गरेको र उक्त प्रतिबद्धतालाई सदैब आत्मसात गरेको बताए।
उनले राज्यबाट आफूले पाउने कुनै पनि सेवा सुविधा नलिने घोषणा गरेका छन्। प्रदेश प्रमुखको हैसियतमा काम गरेको विवरणसहितको पुस्तिका प्रदेश प्रमुख कार्यालयका सचिवलाई हस्तान्तरण गर्दै उनले राज्यबाट पाउने कुनै पनि सेवा नलिने घोषणा गरेका हुन्।
२०७७ साल फागुन ७ गते प्रदेश प्रमुखमा नियुक्त भएका झालाई वर्तमान मन्त्रिपरिषद्को सिफारीसमा राष्ट्रपति विद्यादेवी भण्डारीले मंगलबार पदमुक्त गरेकी छन्। प्रदेश २ का नवनियुक्त प्रदेश प्रमुख मिश्रले सपथ ग्रहण गरिसकेका छन्।