राजधानीमा रातभर बम आतंक : नख्‍खुमा विस्फोट हुँदा तीन जना घाइते, कमलपोखरीमा डिस्पोज

काठमाडौं- राजधानी काठमाडौंमा शुक्रबार राति बम आतंक मच्चाइएको छ। राजधानीका विभिन्‍न ठाउँमा राखिएको बम बिस्फोट भएको छ। 

 ललितपुरको नख्खुस्थित एनसेलको मुख्य कार्यालयअघि शुक्रबार साँझ भएको शक्तिशाली विस्फोटमा तीन जना घाइते भएका छन् भने एकको अवस्था गम्भीर छ।

प्रहरीका अनुसार विस्फोटमा परी काभ्रेकी २५ वर्षीया प्रतीक्षा खड्का, लमजुङ घर भई भैँसेपाटी बस्ने सिंहप्रसाद गुरुङ र मेडिसिटी अस्पतालकी नर्स २५ वर्षीया उरुषा मानन्धर घाइते भएका छन्। तीनै जनाको मेडिसिटी अस्पतालमा उपचार भइरहेको छ।

घाइतेमध्ये गुरुङको अवस्था चिन्ताजनक छ भने बाँकी दुईको पनि तत्काल केही भन्न सक्ने अवस्था नरहेको प्रहरीले जनाएको छ।

त्यसैगरी कमलपोखरीमा रहेको बम नेपाली सेनाको टोलीले डिस्पोज गरेको छ। 

ललितपुरको नख्खुस्थित एनसेल कार्यालयअघि विस्फोट भएलगत्तै कमलपोखरीमा झोलामा प्रेसर कुकर बम राखिएको प्रहरीले जनाएको छ। लगत्तै डिस्पोजल टोलीले घटनास्थललाई ‘सिल’ गरी निस्कृय बनाएको हो। 

बम कसले राखेको भन्‍ने अहिलेसम्म जानकारी नभएको प्रहरीले जनाएको छ। प्रहरीका अनुसार बम राख्‍नेको खोजी भइरहेको र सीसीटीभी फुटेज चेक गरिरहको छ।