कार्यदल भंगसँगै नेकपाको सांगठनिक एकीकरण अन्योलमा

काठमाडौं – नेपाल  कम्युनिस्ट पार्टी (नेकपा) को सांगठनिक एकीकरणका लागि सुझाव प्रस्तुत गर्न गठित कार्यदल भंग भएको छ।

प्रधानमन्त्री निवास बालुवाटरमा शुक्रबार बिहान बसेको सचिवालय बैठकले कार्यदल भंग गर्ने निर्णय गरेको हो। बैठकले अब बाँकी जिम्मेवारी सचिवालयलाई दिने निर्णय गरेको पार्टीका प्रवक्ता नारायणकाजी श्रेष्ठले बताए।

यसअघि विहीबारको बैठकमा कार्यदलले सुझाव प्रस्तुत गर्न एक साताको समय मागेको थियो। तर सचिवालयले म्याद थप्नुको सट्टा कार्यदल नै भंग गरेपछि पार्टीको सांगठनिक एकीकरण प्रक्रिया थप अन्योलमा परेको छ।

गत मंसिर २९ देखि पुस १३ सम्म बसेको स्थायी समिति बैठकले पार्टी एकताको बाँकी काम सहज बनाउन सिफारिस सहितको प्रतिवेदन तयार गर्नका लागि कार्यदल गठन गरेको थियो।

कार्यदलले तीन महिनामा सबै तहको सांगठनिक एकता टुंगो लगाउने घोषणा गरे पनि लामो समयसम्म एकीकरण हुन नसकेपछि नेतृत्वमाथि चाँडो टुंगो लगाउन दबाब परिरहेको थियो।

रामबहादुर थापा बादल नेतृत्वको कार्यदलमा विष्णु पौडेल, वर्षमान पुन, शंकर पोखरेल, सुरेन्द्र पाण्डे, लेखराज भट्ट, बेदुराम भुसाल, रघुवीर महासेठ र योगेश भट्टराईलगाएत थिए।

कार्यदलमै विवाद भएपछि गत सोमबार बसेको सचिवालय बैठक कुनै निर्णयमा पुग्न सकेको थिएन।